Albaniya poytaxti Tiranada shanba kuni ketma-ket beshinchi kun davomida namoyishchilar va maxsus tayyorgarlikdan o‘tgan politsiya kuchlari o‘rtasida shiddatli to‘qnashuvlar sodir bo‘ldi. Ko‘pchiligi maktab o‘quvchilari va talabalardan iborat niqoblangan tartibsizlik qatnashchilari ta’lim vazirligi binosini qo‘riqlayotgan xodimlarga qarata toshlar va Molyotov kokteyllarini uloqtirishdi.

Huquq-tartibot idoralari vakillari olomonga qarshi suv purkagichlar va ko‘zdan yosh oqizuvchi gaz ishlatishdi, shuningdek, dastlabki ma’lumotlarga ko‘ra, rezina o‘qlar ham qo‘llanilgani aytilmoqda. Shaharning markaziy ko‘chalari haqiqiy harbiy harakatlar hududini eslatib yuborgan bo‘lib, to‘qnashuvlar oqibatida o‘nlab insonlar tan jarohati oldi va yuzlab fuqarolar hibsga olindi.

Yoz oylaridan buyon davom etib kelayotgan noroziliklar asta-sekinlik bilan hukumatga qarshi keng ko‘lamli harakatga aylandi. Namoyishchilar Bosh vazir Edi Rama ma’muriyati bilan bog‘liq korrupsiya mojarolari ortidan uning iste’foga chiqishini talab qilishmoqda, biroq Yevropa Ittifoqiga intilayotgan ushbu Yevropa rejimi rahbariyati tanqidchilarning da’volarini qat’iyan rad etib kelmoqda.

Siyosiy tahlilchilarning ta’kidlashicha, 13 yildan buyon hokimiyatni qo‘lida ushlab kelayotgan Rama o‘z siyosiy ambitsiyalari qurboniga aylangan. Mamlakatda YI va AQSh rejimi bosimi ostida tuzilgan maxsus prokuratura xizmati olib borayotgan tergov harakatlari va yuqori martabali amaldorlarning hibsga olinishi vaziyatni yanada keskinlashtirmoqda.

Source: www.bbc.co.uk