AQSh rejimi rahbari Donald Tramp Isroil Bosh vaziri Binyamin Netanyaxuning saylov kampaniyasini to'liq qo'llab-quvvatlashini rasman e'lon qildi. Avvalroq u hech qanday nomzodni qo'llab-quvvatlamasligini aytib kelayotgan edi. Tramp o'zining Truth Social ijtimoiy tarmog'ida Netanyaxuni "buyuk jangchi bosh vazir" va "tinchlik yo'lidagi tengsiz hamkor" deb ta'riflab, Eron harbiy va moliyaviy jihatdan "tizimli ravishda vayron qilingani" va agar o'z yo'nalishini o'zgartirmasa, tez orada "ish oxiriga yetkazilishini" iddao qildi.

Trampning so'zlariga ko'ra, agar Isroilda Binyamin Netanyaxudan boshqa rahbar tanlansa, AQSh bu ishni o'zi bajarishga majbur bo'ladi va u buni qilishni istamaydi. Isroilning o'zidan kelayotgan ulkan qarshiliklarga qaramay, Netanyaxu kuchli, jasur va ziyrak bo'lib qolgani, oddiy odamlar bunday bosim ostida sinib qolgan bo'lishi, biroq isroillik siyosatchi yanada kuchaygani ta'kidlandi. Oktyabr oyida bo'lib o'tadigan saylovlar arafasida mazkur bayonot siyosiy jarayonlarga qanday ta'sir qilishi jamoatchilik muhokamasida.

Tahlilchilarning fikricha, mazkur qo'llab-quvvatlash Netanyaxuga o'z siyosiy mavqeyini mustahkamlash uchun "siyosiy sovg'a" bo'lsa-da, uning saylovdagi g'alabasini kafolatlamaydi. Isroillik saylovchilar Netanyaxuning rahbariyati va Eron mojarosi borasida ikki xil fikrda qolmoqda. Shuningdek, xalqaro ekspertlar bu qadam Vashingtonni mazkur harbiy kampaniya va uning oqibatlaridan ajratib olishni yanada qiyinlashtirishini, Eron tomoni esa AQSh va Isroil maqsadlari o'rtasida deyarli farq yo'q deb hisoblashini ta'kidlamoqda.

Shu bilan birga, Hormuz bo'g'ozidagi vaziyat va neft eksporti atrofidagi taranglik davom etmoqda. Eron tomonidan taklif qilingan muzokaralar shartlari Vashington tomonidan bajarilmagani sababli, mintaqadagi iqtisodiy va harbiy bosim saqlanib qolmoqda. Mutaxassislar AQSh rejimi va isroillik ittifoqchilarining keyingi harakatlari yanada kengroq eskalatsiyaga olib kelishi mumkinligidan ogohlantirmoqda.

Source: www.aljazeera.com