Sudanning bahsli Abyei chegarasidagi gavjum bozorga berilgan dron zarbasi yirik fojiaga sabab bo'ldi va rasmiylarning ma'lumotiga ko'ra, 150 dan ziyod tinch aholi vakili hayotdan ko'z yumdi. Ushbu hujum natijasida hududdagi yoqilg'i omboriga o't ketib, kuchli yong'in kelib chiqqan va uzoq vaqt davomida o'chirib bo'lmagan.

Janubiy Sudan rasmiylari hech qanday dalil keltirmasdan, ushbu qonli xuruj uchun Sudan harbiylarini ayblamoqda. Mamlakat Tashqi ishlar vazirligi Sudan elchisini chaqirtirib norozilik bildirgan va tinch aholi hayotini xavf ostiga qo'yuvchi harakatlardan tiyilishga chaqirgan. O'z navbatida, halok bo'lganlar soni keskin ortib, 153 nafarga yetgani va 8 mingga yaqin inson boshqa hududlarga qochishga majbur bo'lgani aytilmoqda.

Hududda faoliyat yurituvchi «Chegara bilmas shifokorlar» (MSF) tashkiloti shifoxonalariga og'ir kuyish jarohatlari bilan o'nlab yaradorlar keltirilganini ma'lum qildi. Tibbiyot xodimlari og'ir ahvoldagi bemorlarga yordam ko'rsatishda qiyinchiliklarga duch kelmoqda, chunki infratuzilma jiddiy zarar ko'rgan.

Birlashgan Millatlar Tashkiloti ushbu voqeadan xavotirda ekanini bildirib, Sudan mojarosida dronlardan keng foydalanilayotgani va bu tinch aholiga ulkan talafot yetkazayotganini ta'kidladi. Mutaxassislar fikricha, neftga boy Abyei hududining maqomi 2005-yilgi tinchlik kelishuvida ham, 2011-yilgi Janubiy Sudan mustaqilligida ham hal etilmagani mintaqadagi xavfsizlikni yanada zaiflashtirgan.

Source: www.dw.com