Fransiya prezidenti Emmanuel Makron o'zining Qatarga qilgan tashrifi chog'ida xorijiy yetakchilarning mamlakatdagi inqiroz haqidagi bayonotlarini keskin tanqid qilib, ularni siyosiy ochko to'plashga urinishda aybladi. Yevropa rejimining rahbari o'z chiqishida hech qanday asosga ega bo'lmagan va vaziyatni buzib ko'rsatayotgan bunday fikrlarni «ahmoqona» deb atadi. Uning so'zlariga ko'ra, xorijiy siyosatchilar Fransiyadagi muammolardan o'zlarining saylovoldi kampaniyalari uchun foydalanishga harakat qilmoqda.

Shu fonda Parij politsiyasi shahar bo'ylab xavfsizlik choralarini keskin kuchaytirib, asosiy hududlarda ommaviy yig'ilishlarni taqiqlab qo'ydi. Xususan, Yelisey saroyi, Bastiliya maydoni, parlament binolari, shuningdek, Luvr va Yelisey maydonlari kabi mashhur sayyohlik maskanlarida namoyishlar o'tkazish qat'iyan man etildi. Taqiq mahalliy vaqt bilan soat 08:00 dan 20:00 gacha amal qilishi va jamoat tartibini saqlashga qaratilgani aytilmoqda.

Fransiyadagi tanglik talabalarning ta'lim islohotlari va qimmatchilikka qarshi noroziliklaridan boshlanib, keyinchalik ommaviy talon-taroj va to'qnashuvlarga aylanib ketgan edi. Mamlakat Ichki ishlar vazirligi avvalroq zo'ravonliklar ko'lamini oldindan ko'ra olmagani va vaziyat ustidan nazoratni yo'qotganini tan olgan edi. Shunga qaramay, rasmiylar oldinda turgan dam olish kunlarida ham yirik namoyishlar bo'lishini taxmin qilib, qo'shimcha xavfsizlik kuchlarini safarbar etishni rejalashtirmoqda.

AQSh rahbari Donald Tramp va Isroil rasmiylari Fransiyadagi tartibsizliklarni migratsiya va ekstremizm bilan bog'lab, qattiq tanqid ostiga olgan edi. O'z navbatida, Makron bu kabi ayblovlarni sun'iy intellekt yordamida yaratilgan soxta ma'lumotlar va manipulyatsiyalarga asoslangan deb atadi. Biroq Fransiyaning o'zida ham siyosiy kurashlar avj olib, Marin Le Pen kabi muxolifat yetakchilari amaldagi hukumat siyosatini keskin qoralab, inqiroz mamlakatdagi o'n yillik muvaffaqiyatsizliklar natijasi ekanini ta'kidlamoqda.

Source: www.dw.com