Serbiyada o‘tkazilgan muddatidan oldin parlament saylovlarida so‘nggi o‘n yilliklardagi eng yuqori saylovchilar faolligi qayd etildi. Mahalliy vaqt bilan soat 20:00 da saylov uchastkalari yopildi, biroq jarayon ko‘plab qonunbuzarliklar, tahdidlar hamda Yugoslaviya parchalanganidan beri kuzatilmagan ijtimoiy taranglik fonida kechgani aytilmoqda. Ovoz berish natijalari amaldagi hukumat taqdirini hal qilishi kutilmoqda.

Davlat saylov komissiyasining ta'kidlashicha, ovoz berish yakunlanishiga oz qolganda saylovchilar faolligi 64,9 foizni tashkil etgan. Biroq tahlilchilarning fikricha, bunday yuqori ko‘rsatkich qaysi siyosiy kuch foydasiga ishlagani hozircha noma'lum. Belgrad universiteti tadqiqotchisi Yelena Vasilevichning so‘zlariga ko‘ra, hukmron Serb progressiv partiyasi mustahkam elektoratga tayanadi, talabalar harakati esa odatda saylovda qatnashmaydigan qatlamni ham jalb qilishga majbur bo‘lgan.

Mustaqil kuzatuv tashkilotlari saylov jarayonida jiddiy muammolar bo‘lganini qayd etdi. Xususan, “Tadqiqot, shaffoflik va javobgarlik markazi” (CRTA) kuzatuvchilari har uchinchi uchastkada saylovchilarga bosim o‘tkazilganini va ovoz sir saqlanishi buzilganini aniqlagan. Shuningdek, Erkin saylovlar va demokratiya markazi (CeSID) tomonidan byulletenlarga suratga tushish va guruh bo‘lib ovoz berish kabi 260 dan ortiq qoidabuzarliklar qayd etilgani xabar qilindi.

Mazkur saylovlar mamlakatda ikki yildan buyon davom etayotgan talabalar noroziliklari ortidan o‘tkazilmoqda. 2024 yil noyabr oyida Novi-Sad shahrida temir yo‘l stansiyasi shiyponi qulashi oqibatida 16 kishining halok bo‘lishi keng ko‘lamli noroziliklarga sabab bo‘lgan edi. Namoyishchilar hukumatni korrupsiya va repressiyalarda ayblamoqda, biroq amaldagi rahbar Aleksandr Vuchich va uning tarafdorlari bu da'volarni qat'iyan rad etib kelmoqda. Belgradda esa politsiya kuchaytirilgan tartibga o‘tkazilib, saylov komissiyasi binosi atrofiga to‘siqlar o‘rnatildi.

Source: www.aljazeera.com