Andijon viloyatining Asaka tumanida joylashgan yirik tekstil korxonalaridan birida favqulodda holat yuz berib, qator mahsulotlar yong‘indan zarar ko‘rdi.

Rasmiy manbalarning maʼlumot berishicha, joriy yilning 25-oktabr kuni soat 18:03 da yagona 112 qutqaruv tizimi orqali Asaka tumani Uluğbek MFY hududida faoliyat yurituvchi tekstil korxonasida yong‘in chiqib, xavfli vaziyat yuzaga kelgani haqida FVBga tezkor xabar kelib tushgan.

Kelib tushgan xabarga asosan, qutqaruv xizmatining maxsus yong‘in-qutqaruv ekipajlari zudlik bilan ko‘rsatilgan manzilga safarbar etilib, voqea joyiga yetib borgan va olov tarqalishining oldini olishgan. Ko‘rilgan tezkor chora-tadbirlar natijasida yong‘in soat 19:45 da to‘liq o‘chirilishiga erishilgan.

Maʼlum bo‘lishicha, yong‘in oqibatida korxona omboridagi saqlanayotgan paxta toy mahsulotlari yonib, jiddiy zarar ko‘rgan, biroq hodisa oqibatida tan jarohati olganlar yoki jabrlanganlar yo‘qligi maʼlum qilindi.

Hozirgi vaqtda mazkur favqulodda holatning kelib chiqish sabablari va yetkazilgan moddiy zararning aniq miqdori mutasaddi idoralar tomonidan chuqur o‘rganilib, tegishli surishtiruv ishlari olib borilmoqda.

Source: kun.uz