O‘zbekiston Prezidenti raisligida 2026–2030-yillarga mo‘ljallangan ekologiya va atrof-muhitni muhofaza qilish sohasidagi ustuvor umummilliy loyihalar taqdimoti bo‘lib o‘tdi. Taqdimotda mamlakatda ekologik holatni yaxshilash va yashil maydonlarni kengaytirish bo‘yicha keng qamrovli rejalar muhokama qilindi, ular orasida yangi botanika bog‘lari va dendrologik parklar yaratish tashabbusi alohida eʼtiborga olindi.

Loyihalar doirasida, hozirda mamlakatda faoliyat yuritayotgan 3 ta botanika bog‘iga qo‘shimcha ravishda, 2028-yilgacha Qoraqalpog‘iston Respublikasi, barcha viloyatlar va Toshkent shahrida kamida 100 gektar maydonda 12 ta yangi botanika bog‘i va 16 ta dendrologik park barpo etilishi rejalashtirilgan. Ushbu bog‘lar mahalliy va xorijiy o‘simliklarni o‘rganish, saqlash, ko‘paytirish va namoyish qilish, shuningdek, daraxt va buta turlarini ilmiy asosda yetishtirish uchun mo‘ljallangan bo‘lib, har bir mintaqaning tuproq-iqlim sharoitlariga mos turlar tanlanadi.

Taqdimotda, shuningdek, poytaxtda 108 gektar maydonda Milliy dendrologik park yaratish konsepsiyasi taqdim etildi. Ushbu yirik yashil zonada 50 ming daraxt ko‘chati va 100 ming buta ekilishi, sunʼiy ko‘l, sakura bog‘i, o‘n iklim zonalaridan o‘simliklar kolleksiyasi, dam olish joylari va zamonaviy ekologik texnologiyalar (quyosh panellari, qayta ishlangan materiallardan skameykalar) qo‘llanilishi ko‘zda tutilgan. Park markaziy Osiyo atrof-muhit va iqlim o‘zgarishi universiteti uchun tabiiy laboratoriya va aholi uchun ekoturizm markazi sifatida xizmat qiladi.

Loyihalarning umumiy maqsadi 2030-yilga kelib mamlakatdagi yashil maydonlar ulushini 14,2 foizdan 30 foizgacha oshirish, PM2,5 va PM10 zarralari konsentratsiyasini 20–25 foizga kamaytirish va qattiq iqlimli hududlarda havo haroratini o‘rtacha 1,5–2 daraja pasaytirishdir. Milliy dendrologik park esa Toshkent shahrida haroratni 2–4 daraja, namlikni esa 10–15 foiz oshirishga yordam berishi kutilmoqda.

Source: kun.uz