O‘zbekiston Migratsiya agentligi AQShning USA Farm Labor tashkiloti bilan kelishuv imzoladi. Hujjatga ko‘ra, o‘zbekistonliklar AQSh fermer xo‘jaliklarida o‘rtacha 3500 dollar oylik maosh evaziga ishlash imkoniyatiga ega bo‘lishi mumkin. Agentlik rahbari Behzod Musayev Kun.uz nashriga bergan intervyusida, hozirda loyihaning sinov bosqichida kvotalar belgilanish jarayoni davom etayotganini aytdi.

Musayevning so‘zlariga ko‘ra, AQSh tashkiloti ilgari asosan Lotin Amerikasi mamlakatlaridan ishchi kuchi jalb qilgan. So‘nggi yillarda AQSh bilan mustahkam, do‘stona va strategik munosabatlarning o‘rnatilishi bu sohada ham yo‘l ochdi va O‘zbekiston ishchi kuchi jalb qilinadigan mamlakatlar ro‘yxatiga qo‘shildi. "Katta muvaffaqiyatga erishdik deb aytish mumkin. Bugun biz allaqachon kvotalar haqida gaplashmoqdamiz", – dedi u.

Agentlik rahbari ta‘kidlashicha, bunday loyiha ilgari amalga oshirilmagani sababli, birinchi guruh o‘zbekistonliklarning xatti-harakati va mas‘uliyati kelajakdagi ishlarni belgilaydi. Kelishuv onlayn tarzda imzolangan, chunki mamlakatlar orasidagi masofa katta. Keyingi bosqich – kvotalarni ajratish.

Musayevning izohlariga ko‘ra, AQSh tomoni uchun O‘zbekiston yangi ishchi kuchi, yangi millat va yangi mamlakat hisoblanadi. Shu sababli sinov loyihasi doirasida avval ma‘lum miqdordagi odamlarni yuborish rejalashtirilgan. Agar ular mehnatsevarligi, mas‘uliyati, qonunlarga rioya qilishi va jamiyatga tez integratsiyalashuvi bilan namoyon bo‘lsa, kvotalar yildan-yilga oshirilishi kutilmoqda.

Source: kun.uz