Toshkentning Sergeli tumanida Davlat xavfsizlik xizmati va Ichki ishlar organlari birgalikda amalga oshirgan operatsiyada narkotik moddalar ishlab chiqarish laboratoriyasi faoliyati to‘xtatildi. Operatsiya davomida umumiy qiymati 4,5 milliard so‘mdan ortiq bo‘lgan kuchli ta‘sirli moddalar va prekursorlar musodara qilindi.

Ma‘lum qilinishicha, Toshkent viloyati Chinoz tumanidan bo‘lgan bir fuqaro ko‘p qavatli uydagi kvartirani ijaraga olib, u yerda taqiqlangan moddalar ishlab chiqarishni tashkil qilgan. Operativ chora-tadbirlar natijasida huquqni muhofaza qiluvchi organlar 4,5 milliard so‘mdan ortiq qiymatga ega bo‘lgan 3,5 kilogrammga yaqin kuchli ta‘sirli pregabalin preparati, shuningdek, 20 litr suyuq va 25 kilogramm kukunli prekursorlarni musodara qilishdi. Bundan tashqari, preparatlarni tayyorlash va qadoqlash uchun mo‘ljallangan uskunalar ham olib qo‘yildi.

Ishlab chiqarish jarayonida “kimyogar” vazifasini bajargan yana bir Chinoz tumani aholisi ham qo‘lga olindi. Tergov ma‘lumotlariga ko‘ra, ikkala shaxs ilgari Telegram orqali taqiqlangan moddalarni tarqatishda “zakladchilar” rolini o‘ynagan, keyinchalik ular ishlab chiqarish jarayoniga jalb qilingan.

Voqea bo‘yicha jinoiy ish qo‘zg‘atilgan bo‘lib, gumon qilinuvchilar qamoqqa olingan. Tergov ishlari olib borilmoqda. Vazirlik shunga o‘xshash huquqbuzarliklarni aniqlashda fuqarolar 1520 qisqa raqamiga murojaat qilishlari mumkinligini eslatib o‘tdi va maxfiylik kafolatlanganligini ta‘kidladi.

Oldinroq O‘zbekistonda ikki oy ichida sakkizta narkotik moddalar ishlab chiqarish laboratoriyasi yopilgani va 370 kilogrammdan ortiq narkotik moddalar musodara qilingani haqida xabar berilgan edi.

Source: podrobno.uz