Toshkent viloyati Qibray tumanidagi Baytqo‘rg‘on shaharchasini Parkent tumani bilan bog‘lovchi 23,8 kilometrlik bir izlik elektrlashtirilgan temir yo‘l uchastkasining qurilish ishlari muvaffaqiyatli yakunlandi. Transport vazirligi matbuot xizmati bu haqda rasman e’lon qildi. Qurilish ishlari 2025-yil yanvar oyida boshlangan bo‘lib, loyihalash ishlari “Boshtransloyiha” AJ tomonidan amalga oshirilgan, qurilish esa temiryo‘lchi mutaxassislar tomonidan bajarilgan.

Ushbu yangi temir yo‘l liniyasi foydalanishga topshirilgach, Parkent tumani yirik sayyohlik manzillaridan biriga aylanishi kutilmoqda. Parkentdan Toshkentga borish uchun qo‘shimcha qulaylik yaratiladi, shuningdek, tumanning xushmanzara hududlariga sayohat qilish imkoniyatlari sezilarli darajada kengayadi. Hisob-kitoblarga ko‘ra, ushbu yo‘nalish orqali kuniga 275 ming nafargacha yo‘lovchi tashilishi mumkin.

2025-yil iyun oyida Prezident Shavkat Mirziyoyev Parkent tumaniga tashrifi doirasida mazkur temiryo‘l liniyasi loyihasi bilan tanishgan edi. 8-aprel kuni bo‘lib o‘tgan yig‘ilishda Prezident Toshkent viloyati boshqa hududlarga namuna bo‘lishi, bu yerda bandlik darajasi, daromadlar va hayot sifati Toshkent bilan teng bo‘lishi kerakligini ta’kidlagan. Shuningdek, turli sohalarda qator loyihalar amalga oshirilishi ma’lum qilingan.

“Amirsoy” kurort majmuasi va “Bildirsoy rezort” dam olish maskani misolida Parkent, G‘azalkent, Ohangaron va Angrenning tog‘li hududlarida loyihalar amalga oshirilishi mumkin. Ushbu temir yo‘l liniyasi ham aynan shu maqsadga xizmat qiladi – viloyatning iqtisodiy va turistik salohiyatini oshirish, aholi uchun transport imkoniyatlarini yaxshilash.

Source: www.gazeta.uz