Toshkent viloyati, Angren shahrida 12 may kuni ertalab soat 05:00 atrofida A-373 “Toshkent–O‘sh” yo‘nalishida harakatlanayotgan Isuzu rusumli yuk mashinasida yong‘in sodir bo‘ldi.

Viloyat yo‘l harakati xavfsizligi boshqarmasi va favqulodda vaziyatlar boshqarmasi xabariga ko‘ra, hodisa A-373 trassasining 91-kilometrida, Angrendagi “8 Mart” sanoat zonasida ro‘y bergan.

Dastlabki ma’lumotlarga ko‘ra, yuk mashinasini 41 yoshli haydovchi boshqarayotgan bo‘lib, harakat vaqtida yuk bo‘limida yong‘in kelib chiqqan va natijada transport vositasi qisman yonib ketgan.

Yong‘in haqidagi xabar 05:13 da yong‘in-qutqaruv xizmatiga kelib tushgan. Qutqaruv bo‘linmalari voqea joyiga 05:22 da yetib borgan va yong‘in 05:33 da to‘liq o‘chirilgan. Hodisa oqibatida hech kim jabrlanmagan.

Hozirda yong‘in sabablari va yetkazilgan moddiy zarar miqdori aniqlanmoqda.

Source: podrobno.uz