Andijon viloyatida noqonuniy yer uchastkalarini sotish bilan bog‘liq bir necha shaxslar qo‘lga olindi. Bu haqda Davlat xavfsizlik xizmati (DXS) matbuot xizmati xabar berdi.

Gidrouchastka boshlig‘i chorvachilik bilan shug‘ullanmoqchi bo‘lgan fuqarodan 40,5 ming dollar talab qilgan. U tanishlari orqali muhofaza zonasidagi 30 sotix yerni ijaraga berishni va’da qilgan. U 20 ming dollar avans olayotganda qo‘lga olingan.

Tergov davomida ushbu bitimga magistral kanallar boshqarmasi bo‘lim boshlig‘i ham aloqador ekani aniqlangan. U 3 ming dollar olayotganda ushlangan. Shuningdek, o‘sha gidrouchastka xodimi xuddi shu yer uchun 19 ming dollar talab qilgan. Bu fakt ham hujjatlashtirilgan.

Ikkinchi holat Oltinko‘l tumanida sodir bo‘lgan. Maktab direktorlaridan biri xususiy avtomaktabdan 15 ming dollar talab qilgan. Tadbirkor ta’lim muassasasi hududidagi 1,1 gektar yerni ijaraga olish bo‘yicha auktsionda g‘olib chiqqan edi.

Maktab direktori shartnomani tasdiqlash evaziga pul talab qilgan. U 10 ming dollar avans olayotganda qo‘lga olingan. Ikkala fakt bo‘yicha jinoyat ishlari qo‘zg‘atilgan, tergov harakatlari davom etmoqda.

Avvalroq Andijon viloyatida amaldorlar ishtirokidagi uchta korrupsion sxema fosh etilgani xabar qilingan edi. Gumonlanuvchilar sud qarorlari, zararni kamaytirish va noqonuniy yer ajratish uchun pul talab qilgan.

Source: podrobno.uz