O‘zbekistonda soliq tizimi islohoti davom etmoqda: 2027 yildan boshlab boshqaruv, soliq imtiyozlari va soha mutaxassislarini rag‘batlantirishning yangi mexanizmlari joriy etilishi rejalashtirilgan. Tegishli chora-tadbirlar prezident farmonida belgilangan.

Yangiliklardan biri — “Xizmat ko‘rsatgan soliq xizmati xodimi” ko‘krak nishonining ta’sis etilishi. Bu nishon soliq tizimini rivojlantirishga katta hissa qo‘shgan mutaxassislarga beriladi.

2027 yil 1 yanvardan soliq ma’muriyatchiligida o‘zgarishlar kuchga kiradi. Xususan, qishloq xo‘jaligi yerlariga soliq vakolatli organlar taqdim etgan ma’lumotlar asosida hisoblanadi va soliq to‘lovchilardan hisobot talab qilinmaydi.

Jismoniy shaxslarning ipoteka kreditlarini to‘lashga yo‘naltirilgan daromadlari bo‘yicha soliq imtiyozlari proaktiv tartibda qo‘llaniladi. Ortiqcha to‘lov bo‘lsa, mablag‘ fuqaroning arizasiga ko‘ra 10 ish kuni ichida qaytariladi.

Yirik soliq to‘lovchilar uchun mezonlar belgilandi: oxirgi 12 oyda to‘langan soliqlar miqdori 500 ming BRVdan oshgan korxona va tijorat banklari “o‘ta yirik” toifasiga kiritiladi.

Kadrlar tayyorlash maqsadida O‘zbekiston Soliq qo‘mitasi huzurida Soliq solish oliy maktabi tashkil etiladi. U 2026/2027 o‘quv yilidan boshlab faoliyat yuritadi.

Shuningdek, soliq tartib-taomillari soddalashtiriladi va biznes uchun xizmat ko‘rsatish sifati oshiriladi.

Source: podrobno.uz