O‘zbekiston hukumati kasb-hunar ta’limida xususiy sektor ishtirokini keskin kengaytirishni rejalashtirmoqda. Prezident Shavkat Mirziyoyev taqdimot bilan tanishib, uch yil ichida xalqaro standartlar bo‘yicha ishlaydigan o‘quv va baholash markazlari sonini 50 tadan 200 taga yetkazishni ma’qulladi.

Hozirda yiliga 45 ming kishini qamrab olgan xususiy kasb-hunar ta’limi 500 ming kishiga yetkaziladi. Buning uchun 300 dan ortiq o‘quv dasturi xalqaro talablarga moslashtiriladi, mingdan ortiq o‘qituvchi va ustalar malakasini oshiradi. Bandlik jamg‘armasidan 500 milliard so‘m ajratiladi.

Tadbirkorlar takliflari asosida soliq va bojxona imtiyozlari, imtiyozli kreditlar, xarajatlarning bir qismini qoplash, infratuzilma qurish va yer uchastkalaridan foydalanishda yordam ko‘zda tutilgan. Xususiy ta’lim tashkilotlari uskuna olib kirishda bojxona to‘lovlaridan ozod qilinadi, xorijiy mutaxassislar uchun ijtimoiy soliq 1% etib belgilanadi.

7 yilgacha muddatli, 2 yillik imtiyozli davrga ega kreditlar beriladi. Davlat qurilish, ta’mirlash va jihozlash uchun olingan kreditlarning 7% stavkasini kompensatsiya qiladi. Shuningdek, xorijiy o‘qituvchilarni jalb qilish xarajatlarining 50%, ko‘nikmalarni baholash uskunalari xarajatlarining 30% va sertifikat olish xarajatlarining yarmi qoplanadi.

Qo‘llab-quvvatlash olgan tadbirkorlar binolarning kamida 60% maydonida o‘quv va amaliy mashg‘ulotlar tashkil etishi shart. Yer uchastkalari uchun 5 yilgacha foizsiz bo‘lib to‘lash, bo‘sh davlat ob’ektlarini kamida 5 yilga ijaraga olish va texnikumlardagi xonalardan bepul foydalanish imkoniyati yaratiladi.

Yil oxirigacha xususiy tashkilotlarni jihozlash uchun 100 million dollar jalb qilinadi. Bitiruvchilar loyihalarini qo‘llab-quvvatlash uchun 5 million dollarlik venchur fondi tashkil etiladi. “Kasbga vaucher” dasturiga har yili 20 milliard so‘m ajratiladi.

Xususiy kasb-hunar ta’limi tashkilotlari assotsiatsiyasi va “Ko‘nikmalar parki” ekotizimi yaratiladi. Davlat organlari bilan hamkorlik qilish uchun raqamli platforma joriy etiladi. Prezident chora-tadbirlarni ma’qullab, o‘quv dasturlarini xalqaro standartlarga moslashtirish va aholini talab qilinadigan kasblar bilan qamrab olishni topshirdi.

Shuningdek, O‘zbekistonda o‘rta maxsus va kasb-hunar ta’limi uchun moddiy rag‘batlantirish tizimi joriy etiladi. Har yili texnikum va akademik litseylarning milliy reytingi shakllantiriladi, yetakchilar rivojlanish uchun katta mablag‘ oladi.

Source: podrobno.uz