Samarqand viloyati Urgut tumanida yashovchi Doston (ismi o‘zgartirilgan) Rossiyada aldov bilan harbiy kontrakt imzolatib, Ukrainadagi urushga jo‘natilgan. U 2026-yil 2-iyulda Jinoyat kodeksining 154-1-moddasi 2-qismi (xorijiy davlatlarning harbiy xizmatiga kirish) bo‘yicha 3,6 yil ozodlikni cheklash jazosiga hukm qilindi.

Doston 2025-yil iyul oyida Moskvaga ishlash uchun ketgan. 13-avgust kuni u taksidan tushayotganda migratsiya xizmati xodimlari tomonidan to‘xtatilgan. Ularga patent yo‘qligini aytgan, shundan so‘ng unga patent rasmiylashtirish uchun manzil berilgan. U yerga borib, ikki ayol tomonidan rus tilidagi hujjatlarga imzo chekishga majbur qilingan. Keyinchalik bu harbiy kontrakt ekani ma’lum bo‘lgan.

14-avgust kuni Dostonni boshqa 24 kishi bilan birga Voronejga olib ketishgan. U yerdan Luganskka jo‘natilgan. U harbiy mashg‘ulotlardan bosh tortgani uchun kaltaklangan va qamoqqa tashlangan. Otasi uning qayerdaligini bilganidan so‘ng, Moskvaga borib, O‘zbekiston elchixonasiga murojaat qilgan, biroq yordam ololmagan.

Doston 2026-yil 13-mart kuni qochishga muvaffaq bo‘lgan. U 14 kun davomida o‘rmonlarda yashirinib, 27-mart kuni Moskvadagi O‘zbekiston elchixonasiga yetib borgan. 5-aprelda O‘zbekistonga qaytarilgan va hibsga olingan.

Sudda Doston o‘z aybiga iqror bo‘lib, kontraktni bilmagan holda imzolaganini va jangovar harakatlarda qatnashmaganini aytgan. Sud uning holatini inobatga olib, 3,6 yil ozodlikni cheklash jazosini tayinlagan.

Source: kun.uz