O‘zbekiston Fanlar akademiyasi Mirzo Ulug‘bek nomidagi Astronomiya instituti xodimlari Kamoliddin Ergashev va Otabek Burxonov sharafiga ikki asteroid nomlandi. Yangi nomlar Xalqaro astronomiya ittifoqining kichik jismlar nomenklaturasi bo‘yicha ishchi guruhi rasmiy byulletenida e’lon qilindi.

Ilgari 2001 KA2 belgisi bilan ma’lum bo‘lgan (131358) asteroid endi Kamolergashev deb ataladi. Bu samoviy jism 2001-yil 19-mayda chexiyalik astronomlar Petr Pravets va Petr Kushnirak tomonidan Chexiyadagi Ondrjejov rasadxonasida kashf etilgan.

Kamoliddin Ergashev Astronomiya institutining asteroidlarni o‘rganish guruhiga 2007-yilda qo‘shilgan va 2024-yilda falsafa doktori darajasini olgan. Uning ilmiy ishi asteroidlarning fotometriyasi, yorug‘lik egri chiziqlarini tahlil qilish, samoviy jismlarning fizik xususiyatlarini aniqlash, shuningdek, asteroid juftliklari, klasterlari va qo‘shaloq tizimlarni o‘rganish bilan bog‘liq.

Otabek Burxonov sharafiga (121339) asteroid nomlandi, u endi rasman Otabekburkhonov deb ataladi. U 1999-yil 13-oktyabrda xuddi shu Chexiya rasadxonasida kashf etilgan. Doimiy nom berilgunga qadar obyekt 1999 TO15 belgisi bilan ro‘yxatga olingan edi.

Otabek Burxonov Mirzo Ulug‘bek nomidagi Astronomiya institutida 2000-yildan beri ishlaydi. U optik fotometriya, asteroidlar va o‘zgaruvchan yulduzlarning yorug‘lik egri chiziqlarini o‘rganish, gravitatsion linzali kvazarlar, shuningdek, Maydanoq rasadxonasida gamma-portlashlarning keyingi optik kuzatuvlari bilan shug‘ullanadi.

Eslatib o‘tamiz, avvalroq ushbu olimlar sayyoralarni himoya qilishga qo‘shgan hissasi uchun NASA xalqaro mukofotiga sazovor bo‘lishgan edi.

Source: podrobno.uz