Adliya vazirligi Qo‘qon patirini geografik ko‘rsatma sifatida ro‘yxatga olib, maxsus reestrga kiritdi. Bu haqda Intellektual mulk agentligi matbuot xizmati xabar berdi.

Xabarda aytilishicha, Qo‘qonning gastronomik merosining noyob namunalaridan biri bo‘lgan patir o‘ziga xos ta’mi, an’anaviy retsepti va maxsus pishirish texnologiyasi bilan ajralib turadi.

Ushbu non turi o‘ziga xos pishirish usuli tufayli bir necha hafta davomida ta’m sifatlari va yangiligini saqlab qolishi mumkin.

Geografik ko‘rsatma maqomini berish nom va an’anaviy tayyorlash texnologiyasini huquqiy himoya qilish, mahsulotning noyob xususiyatlarini saqlash va sifat kafolatlarini mustahkamlash imkonini beradi.

Geografik ko‘rsatma – bu mahsulotning ma’lum bir hudud, uning tabiiy, insoniy va tarixiy xususiyatlari bilan bog‘liq maxsus xususiyatlarga ega ekanligini bildiruvchi intellektual mulk ob’ekti.

Source: uznews.uz