Chirchiqda 73 yoshli nafaqaxo‘r ayol ko‘chada qarovsiz mushuklarni boqgani uchun jarimaga tortilganidan keyin vafot etdi. U 22-iyul kuni o‘z uyida o‘lik holda topildi.

Iyun oyi oxirida ayol va miya falaji bilan kasallangan bir qiz ko‘p qavatli uyning kirish qismida mushuklarni boqqanliklari uchun ma’muriy javobgarlikka tortilgan edi. Qo‘shnilarning “antisanitariya”, yoqimsiz hid va hayvonlar ko‘paygani haqidagi shikoyatlari sabab bo‘lgan. Har biriga 1,2 million so‘m miqdorida jarima solingan.

21-iyul kuni “Mehr va Oqibat” hayvonlarni himoya qilish jamiyati vakillari ayol, mahalla raisi va uchastka inspektori bilan uchrashgan. Ko‘ngillilarning so‘zlariga ko‘ra, hovlida antisanitariya belgilari aniqlanmagan. Tashkilot yuristi ayolga jarimani bekor qilish uchun sudga shikoyat tayyorlashda yordam bergan.

Ayol shikoyat uchun yozgan tushuntirish xatida: “Men uysiz mushuklarga juda achinaman. Ularni tepishayotganini, tosh otishayotganini ko‘raman va ularni himoya qiladigan hech kim yo‘q”, deb yozgan. U, shuningdek, mahalla raisining tanbehidan keyin uy yonida hayvonlarni boqishni to‘xtatganini, qo‘shnilar esa har bir chiqishini kuzatayotganini aytgan: “Bir necha kundan beri kuzatuv tufayli kvartiradan chiqa olmayapman. Mushuklar ham qolmadi, tarqab ketishdi.”

22-iyul kuni ertalab ko‘ngilli tayyorlangan hujjatlarni imzolash uchun kelganida eshikni hech kim ochmagan. FVV xodimlari kvartirani ochgandan so‘ng ayolni jonsiz holda topishgan. Rasmiy o‘lim sababi ma’lum qilinmagan. “Mehr va Oqibat” vakillari fojiani ma’muriy ish bilan bog‘lashga shoshilmaslikka chaqirgan, biroq so‘nggi haftalarda ayol sodir bo‘lgan voqeani og‘ir kechirganini ta’kidlagan.

Avvalroq O‘zbekistonda ko‘cha mushuklari atrofida mojaro kelib chiqqan edi: amaldagi qonunchilik “Mushukkent” loyihasi ishini xavf ostiga qo‘ygan va ko‘ngillilar hayvonlarni parvarish qilgani uchun jarimaga tortilmoqda.

Source: podrobno.uz