O‘zbekistonda tabiiy gazga ulanish imkoniyati cheklangan 1916 ta aholi punktini elektr isitish tizimiga o‘tkazish bo‘yicha hisob-kitoblar uch oy ichida tayyorlanadi.

Bu topshiriq prezident Shavkat Mirziyoyev raisligida yoqilg‘i-energetika sohasini rivojlantirish masalalariga bag‘ishlangan yig‘ilishda berildi.

Mas’ul idoralar loyihani amalga oshirish uchun qanday energetika infratuzilmasi va qo‘shimcha elektr energiyasi hajmlari zarurligini aniqlashi kerak. Davlat mablag‘lari talab etiladigan aholi punktlari uchun alohida reja ishlab chiqiladi.

Yig‘ilishda, shuningdek, aholini suyultirilgan gaz bilan ta’minlash masalalari muhokama qilindi. Hozirda 3,7 millionga yaqin uy xo‘jaliklari ushbu yoqilg‘idan foydalanadi. Tizim raqamlashtirilganiga qaramay, yoqilg‘ini o‘z vaqtida yetkazib berish muammosi to‘liq hal etilmagan.

Shu munosabat bilan suyultirilgan gaz yetkazib berishda xususiy sektorni jalb qilish taklifi ma’qullandi. Pilot loyiha Andijon viloyatida ishga tushirilishi rejalashtirilgan.

Avvalroq Shavkat Mirziyoyev energetika sohasidagi kadr o‘zgarishlari sabablarini tushuntirgandi. Uning so‘zlariga ko‘ra, energetika vaziri va “Hududiy elektr tarmoqlari” rahbari tizimdagi jiddiy kamchiliklar tufayli lavozimlaridan ozod etilgan.

Source: podrobno.uz