Fiskal tadqiqotlar instituti mutaxassislari 2028-yildan boshlab O‘zbekistonda yirik sanoat korxonalari uchun uglerod solig‘ini joriy etishni taklif qilmoqda.

Taklifga ko‘ra, soliq yirik sanoat korxonalarining chiqindilariga nisbatan qo‘llaniladi. Soliq bazasi sifatida CO₂ chiqindilari hajmi yoki uglevodorod yoqilg‘isi iste’moli ko‘rib chiqilmoqda.

Birinchi bosqichda eng yirik chiqindi manbalarini qamrab olish, keyinchalik esa yangi soliq bilan qamrab olinadigan korxonalar doirasini bosqichma-bosqich kengaytirish taklif etilmoqda.

Institut mutaxassislarining baholashicha, uglerod solig‘i chiqindilar qiymatini korxonalar xarajatlariga kiritish imkonini beradi, bu esa ularni energiya samaradorligini oshirishga va chiqindilar hajmini kamaytirishga undaydi. Bundan tashqari, ichki uglerod narxlari mahalliy korxonalarning xorijda uglerod to‘lovlarini to‘lash xavfini kamaytirishi mumkin.

2027-yilda chiqindilarni inventarizatsiya qilish, soliq bazasi, stavkalar va qamrovni aniqlash taklif etilmoqda. Soliqni bevosita joriy etish 2028-yilda boshlanishi, 2029–2030-yillarda esa stavkalarni bosqichma-bosqich oshirish ko‘zda tutilgan. Uglerod solig‘ini joriy etishdan fiskal samara 2028-yildan kutilmoqda.

Source: www.uznews.uz