O‘zbekiston va Qirg‘iziston o‘rtasidagi iqtisodiy hamkorlik yangi bosqichga ko‘tarilmoqda. Investitsiyalar, sanoat va savdo vaziri Laziz Qudratov prezident Shavkat Mirziyoyevning Qirg‘izistonga davlat tashrifi yakunlarini izohlab, qishloq xo‘jaligi, geologiya-qidiruv, energetika, qurilish materiallari ishlab chiqarish va transport sohalarida qo‘shma loyihalar amalga oshirilishini ma’lum qildi.
Vazirning so‘zlariga ko‘ra, tomonlar Qirg‘iziston hududida qoramol yetishtirish bo‘yicha qo‘shma klaster tashkil etish, sholi va kartoshka yetishtirish bo‘yicha kelishuvlarga erishgan. O‘zbekiston tadbirkorlari qurilish materiallari sohasida faol ish olib borib, alyuminiy profillar, polimer mahsulotlari va qurilish qorishmalarini ishlab chiqarishni yo‘lga qo‘ygan.
Hamkorlikning yangi yo‘nalishlaridan biri geologiya-qidiruv ishlari bo‘ladi. O‘zbekistonning tegishli vazirliklari va ixtisoslashgan kompaniyalari Qirg‘iziston hududida bu yo‘nalishda ishlarni amalga oshirishni rejalashtirmoqda. Laziz Qudratov bu sohada kompaniyalarimiz muayyan tajriba to‘plaganini ta’kidladi.
Ustuvor yo‘nalishlar qatorida energetika, Qambarota GES loyihasi va kichik energetikani rivojlantirish ham qayd etildi. Transport sohasida Xitoy — Qirg‘iziston — O‘zbekiston temiryo‘li qurilishi belgilangan jadvaldan oldinda ketmoqda. Shuningdek, yuklarni tranzit qilish, qayta ishlash va bojxona rasmiylashtiruvi uchun qulay shart-sharoitlar yaratish bo‘yicha kelishuvlarga erishildi.
O‘zbekiston — Qirg‘iziston biznes forumi yakunlari bo‘yicha umumiy qiymati 1,5 mlrd dollardan ortiq bo‘lgan loyihalar va savdo shartnomalari imzolandi. Yil boshidan buyon ikki mamlakat o‘rtasidagi o‘zaro savdo hajmi 45 foizga oshib, 624,6 mln dollarga yetdi. 2025-yil yakunlariga ko‘ra esa tovar ayirboshlash hajmi 37 foizga o‘sib, 1,2 mlrd dollarga yetishi kutilmoqda.
Vazir davlat tashrifini tarixiy voqea deb atab, uning fikricha, u O‘zbekiston — Qirg‘iziston munosabatlarining yangi bosqichini ochib beradi. Avvalroq, 30-iyul kuni chegara masalalarini to‘liq hal etadigan va o‘zaro o‘tkazish punktlari sonini 15 tadan 30 tagacha oshiradigan hujjatlar imzolangan edi. Shuningdek, Andijonda Qirg‘izistonning bosh konsulxonasini ochish qarori qabul qilingan.
Prezident Shavkat Mirziyoyev Xitoy — Qirg‘iziston — O‘zbekiston temiryo‘li qurilishini mintaqa geosiyosiy holatini o‘zgartiradigan “asr qurilishi” deb atadi. Muzokaralar yakunida prezidentlar O‘zbekiston va Qirg‘iziston o‘rtasida ittifoqchilik munosabatlari to‘g‘risidagi shartnomani imzoladi.
Source: www.gazeta.uz