Toshkent shahridagi “Toshkent-Aero” ixtisoslashtirilgan bojxona majmuasining “Avia yuklar” tashqi iqtisodiy faoliyat bojxona postida Xitoydan olib kelingan 21 tonnadan ortiq soxta “Efba” dori vositasini olib kirishga urinish aniqlandi.

Bojxona ko‘rigi chog‘ida yuk bojxona deklaratsiyasida preparat Hindistonda ishlab chiqarilgan deb ko‘rsatilgani ma’lum bo‘ldi. Biroq tekshiruv shuni ko‘rsatdiki, o‘ram va yorliqlarda ishlab chiqaruvchi mamlakat va korxona haqida ma’lumot yo‘q edi. Buning o‘rniga faqat preparat tayyorlangan kompaniya ko‘rsatilgan. Bundan tashqari, o‘ramdagi xitoycha ierogliflar dori Hindistonda ishlab chiqarilmaganligidan dalolat berardi.

Preparatni O‘zbekistonga olib kirish uchun Sog‘liqni saqlash vazirligi huzuridagi Farmatsevtika mahsulotlari xavfsizligi markazining muvofiqlik sertifikati talab qilinadi. Tergov ma’lumotlariga ko‘ra, yuk egalari ushbu sertifikatni Hindistonda ishlab chiqarilgan asl preparatni namuna sifatida taqdim etib olishgan va keyinchalik uni katta partiyadagi soxta mahsulotni olib kirishda foydalanishni rejalashtirishgan.

Agar sxema fosh etilmaganida, mamlakat dorixonalariga 160 mingdan ortiq o‘ram soxta dori tushishi mumkin edi.

“Efba” preparatining asosiy faol moddasi levofloksatsin – ftorxinolonlar guruhiga kiruvchi antibiotikdir. Bunday dori vositalarining soxtasi sog‘liq uchun xavfli oqibatlarga olib kelishi mumkin.

Olib qo‘yilgan dorilar vaqtincha saqlashga joylashtirilgan. Dastlabki hisob-kitoblarga ko‘ra, ularning qiymati 7,3 milliard so‘mdan oshadi. Ushbu holat bo‘yicha jinoiy ish qo‘zg‘atilgan.

Source: uznews.uz