Toshkentning Yashnobod tumanida 75 yoshli ayolga nisbatan beadablik qilgan 22 yoshli yigit qo'lga olindi. Voqea 4 avgust kuni ertalab soat 05:30 atrofida Shirobod massivida sodir bo'lgan.

Politsiya ma'lumotlariga ko'ra, yigit mast holda bo'lib, keksa ayolga nisbatan odobsiz harakatlar qilgan va voqea joyidan qochishga urungan. Biroq, atrofdagi fuqarolar uni ushlab, ichki ishlar organlari xodimlariga topshirishgan.

Toshkent shahar IIBB xabariga ko'ra, ushlangan yigit o'z qilmishini mastlik bilan izohlab, huquq-tartibot xodimlarini chaqirmaslikni so'ragan. Uning so'zlariga ko'ra, u nima qilayotganini bilmagan.

Yigitga nisbatan mayda bezorilik, jamoat joylarida alkogol ichish va huquq-tartibot xodimlarining qonuniy talablarini bajarmaslik moddalari bo'yicha ma'muriy bayonnomalar tuzilgan.

Hozirda ish materiallari Yashnobod tumani jinoyat ishlari bo'yicha sudiga ko'rib chiqish uchun yuborilgan. Sud qaroriga ko'ra, yigitga nisbatan tegishli jazo choralari qo'llaniladi.

Source: podrobno.uz