Qashqadaryo viloyatida yashovchi 31 yoshli fuqaro ekstremistik faoliyatda ishtirok etish va terrorizmni moliyalashtirishda ayblanib, 10 yilga ozodlikdan mahrum etildi. Bu haqda Davlat xavfsizlik xizmati (DXX) rasmiy xabar berdi.

Ma'lum qilinishicha, erkak 2017-yilda Janubiy Koreyadagi universitetlardan biriga o'qishga kirgan. O'qish davrida, taxminan 2020-yilda, u ijtimoiy tarmoqlar orqali tarqatilayotgan terroristik tashkilotlarning materiallari bilan tanishgan, ushbu tashkilotlar a'zolari bilan muloqot qilishni va ularning materiallarini tarqatishni boshlagan.

Universitetni tugatgach, erkak Koreyada qolib ishlagan. 2023-yil oxirida u Telegram'dagi “G'uroba katibasi” guruhiga a'zo bo'lgan, u yerda foydalanuvchilar muhtojlarga pul yuborishga chaqirilgan. Ayblanuvchi bloger Saad Muxtorga (Qirg'iziston fuqarosi, xalqaro qidiruvda) ishonib, pul yuborganini ma'lum qilgan. O'sha vaqtda u O'zbekistonga qaytib kelgan.

Tergov ma'lumotlariga ko'ra, 2024-yilning iyul oyida erkak Suriyadagi jangarilarga qo'shilish uchun Turkiyaga jo'nab ketgan, biroq uning rejalari amalga oshmay, vataniga qaytib kelgan. U huquqni muhofaza qiluvchi organlar tomonidan o'tkazilgan tezkor tadbir davomida qo'lga olingan.

Sud erkakni Jinoyat kodeksining 244−1-moddasi (Jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish), 244−2-moddasi (Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish), 155−2-moddasi (Terroristik faoliyatni amalga oshirish maqsadida o'quvdan o'tish, chiqib ketish yoki harakatlanish) va 155−3-moddasi (Terrorizmni moliyalashtirish) bilan aybdor deb topdi.

DXX videosida erkak bir nechta tilni bilishi, xorijiy ma'lumoti va kasbi bo'la turib, aldanganini va o'z qilmishlaridan pushaymonligini aytgan. Ushbu holat yoshlar orasida ekstremistik g'oyalar tarqalishining oldini olish bo'yicha jiddiy ogohlantirish bo'lib xizmat qilmoqda.

Source: www.gazeta.uz