Qashqadaryo viloyati hokimi Murotjon Azimov tomonidan viloyatdagi oliy ta’lim muassasalarida tahsil olayotgan, moddiy qiyinchiliklarga duch kelayotgan talabalarga kontrakt to‘lovlarini amalga oshirish uchun 3 milliard 780 million 600 ming so‘m miqdorida mablag‘ ajratish to‘g‘risida qaror qabul qilindi.

Ushbu mablag‘lar 856 nafar talabaning kontrakt to‘lovlarini qoplashga yo‘naltiriladi. Qaror, ayniqsa, oilaviy daromadi past bo‘lgan, lekin oliy ma’lumot olishni istagan yoshlar uchun muhim ahamiyatga ega.

Viloyat hokimligi ma’lumotlariga ko‘ra, bu tashabbus talabalarning o‘qishni davom ettirishlari va moliyaviy muammolar tufayli ta’limdan voz kechmasliklariga yordam beradi. Ayniqsa, qizlarning oliy ma’lumot olishi, kasbiy ko‘nikmalarini rivojlantirishi va kelajakda mustaqil faoliyat yuritishiga alohida e’tibor qaratilgan.

Viloyat rahbariyati ta’kidlashicha, yoshlarning ta’lim olishiga ko‘maklashish nafaqat ijtimoiy yordam, balki inson kapitaliga va viloyat kelajagiga qilingan sarmoyadir. Bu tashabbus O‘zbekiston mustaqilligining 35 yilligi arafasida amalga oshirilmoqda.

Eslatib o‘tamiz, avvalroq O‘zbekistonda davlat muassasalarida kamida 15 yil ish stajiga ega bo‘lgan tibbiyot va farmatsevtika xodimlarining farzandlariga oliy ta’limda o‘qish xarajatlarining bir qismi qoplanishi belgilangan edi.

Source: podrobno.uz