12-avgust kuni Surxondaryo viloyatining Boysun tumani “Chilonzor” MFYsida joylashgan “Boysun davlat o‘rmon xo‘jaligi”ga qarashli “Xomkon” o‘rmon bo‘limi hududida yong‘in kelib chiqdi. Bu haqda viloyat Favqulodda vaziyatlar boshqarmasi xabar berdi.

Qayd etilishicha, soat 17:15 da 112 tizimiga hodisa haqida xabar kelib tushgan. Alanga asosan quruq o‘t va shox-shabbalarni qamrab olgan. Yong‘in tezda kengayib, atrofdagi o‘rmon maydoniga tarqalish xavfi tug‘ilgan.

Xabar asosida voqea joyiga viloyat FVB hamda “Boysun davlat o‘rmon xo‘jaligi”ning kuch va vositalari yo‘naltirilgan. Yong‘inni o‘chirishga 309 kishi va 11 ta maxsus texnika jalb qilingan. Xususan, FVBdan 194 nafar shaxsiy tarkib va 8 ta texnika, o‘rmon xo‘jaligidan 60 nafar xodim va 3 ta texnika hamda 55 nafar ko‘ngilli mahalliy aholi borgan.

Oradan bir sutka o‘tib — 13-avgust kuni soat 17:30 da yong‘in to‘liq bartaraf etilgan. Hodisa oqibatida taxminan 1 gektar maydondagi quruq o‘t va shox-shabbalar yonib ketgan. Bu o‘rmon xo‘jaligi uchun sezilarli yo‘qotish bo‘lib, ekologik zarar yetkazgan.

Hodisa oqibatida fuqarolarning jarohat olish holatlari qayd etilmagani ta’kidlandi. Shuningdek, yong‘inning kelib chiqish sabablari aniqlanmoqda. Favqulodda vaziyatlar boshqarmasi fuqarolarni ehtiyot bo‘lishga chaqirib, yong‘in xavfsizligi qoidalariga qat’iy rioya qilishni so‘radi.

Source: www.gazeta.uz