O‘zbekiston Prezidenti Shavkat Mirziyoyev Qoraqalpog‘iston Respublikasiga tashrifi chog‘ida Nukus shahridagi “Nukus Insulation Group” korxonasi faoliyati bilan tanishdi. Ushbu zavod mahalliy bazalt xomashyosidan zamonaviy issiqlik izolyatsiya materiallari ishlab chiqarishga ixtisoslashgan.

Loyiha qiymati 50 million dollarni tashkil etadi. Korxonada Yevropa uskunalari o‘rnatilgan bo‘lib, yiliga 50 ming tonna issiqlik izolyatsiya materiallari ishlab chiqarish quvvatiga ega. Bu 300 milliard so‘mlik mahsulot ishlab chiqarish va 150 ta yangi ish o‘rni yaratish imkonini beradi.

Bazalt asosidagi mahsulotlar yong‘inga chidamliligi, samarali issiqlik izolyatsiyasi xususiyatlari va uzoq xizmat muddati bilan ajralib turadi. Ulardan foydalanish binolarning energiya samaradorligini oshiradi, isitish va sovutish xarajatlarini kamaytiradi.

Prezident ishlab chiqarish sexlarini ko‘zdan kechirdi va mehnat jamoasi bilan suhbatlashdi. Shuningdek, u Qoraqalpog‘iston tumanlariga biriktirilgan viloyat hokimlarining hisobotlarini tingladi.

Davlat rahbari hududlarni qo‘llab-quvvatlash ko‘lamini kengaytirish, ishlab chiqarish kooperatsiyasini mustahkamlash, mavjud imkoniyatlardan birgalikda foydalanish va aholi daromadlari hamda bandligini oshirishga qaratilgan loyihalar sonini ko‘paytirish zarurligini ta’kidladi.

Source: podrobno.uz