Bugungi kunda Toshkent shahrining Chilonzor, Yashnobod, Yangihayot va Yakkasaroy tumanlarida rahbariyat oʻzgargani munosabati bilan yangi hokimlar tayinlangani maʼlum qilindi. Poytaxt hokimligida boʻlib oʻtgan oʻzgarishlar doirasida shahar tumanlari boshqaruvida qator kadrlar almashinuvi amalga oshirildi, bu esa hududlarni rivojlantirish borasidagi ishlarni yangi bosqichga olib chiqishni maqsad qilgani aytilmoqda.

Xususan, Hayot Ilyosovich Inogʻomov Toshkent shahri Chilonzor tumani hokimi etib tayinlandi. Maʼlumot uchun, u 1986-yilda Toshkent shahrida tugʻilgan boʻlib, 2006-yilda Toshkent avtomobil yoʻllari institutini, 2008-yilda esa shu institut magistraturasini tamomlagan. Mehnat faoliyati davomida transport va yoʻl infratuzilmasi hamda davlat boshqaruvi tizimida masʼul lavozimlarda ishlagan, shuningdek, Toshkent shahri hokimi oʻrinbosari sifatida ham faoliyat yuritgan. 2020-yil noyabridan buyon Yangihayot tumaniga rahbarlik qilib kelayotgan edi. Chilonzor tumanini 2022-yil avgustidan beri boshqarib kelgan Saidqahhor Xolxoʻjayev esa egallab turgan lavozimidan ozod etilib, Investitsiyalar, sanoat va savdo vaziri oʻrinbosari lavozimiga oʻtishi kutilmoqda.

Shuningdek, Hayot Inogʻomovning oʻrniga Yangihayot tumaniga Lazizbek Poʻlatovich Temirov yangi hokim etib tayinlandi. 1989-yilda Fargʻona viloyatida tugʻilgan Lazizbek Temirov Toshkent davlat iqtisodiyot universitetini tamomlagan boʻlib, u bunga qadar Yashnobod tumani hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari lavozimida ishlab kelayotgan edi. Oʻz navbatida, Yashnobod tumaniga 1980-yilda tugʻilgan va Toshkent davlat texnika universitetini tamomlagan Abdulaziz Ahatovich Abdulhakov hokim etib tasdiqlandi.

Source: kun.uz