Oʻzbekiston Respublikasi Prezidenti Shavkat Mirziyoyev Osiyoda hamkorlik va ishonch choralari boʻyicha kengash sammiti doirasida Qatar Amiri Shayx Tamim bin Hamad Ol Soniy bilan rasmiy uchrashuv oʻtkazdi. Muzokaralar chogʻida ikki tomonlama strategik sheriklik munosabatlarini yanada chuqurlashtirish va amaliy aloqalarni kengaytirishning dolzarb masalalari koʻrib chiqildi.

Tomonlar soʻnggi yillarda oliy darajada yoʻlga qoʻyilgan faol muloqotlar tufayli oʻzaro munosabatlar sifat jihatidan yangi bosqichga koʻtarilganini mamnuniyat bilan qayd etdilar. Xususan, Qatar kompaniyalari bilan energetika, kimyo sanoati, oziq-ovqat xavfsizligi, transport va qurilish kabi ustuvor yoʻnalishlarda muvaffaqiyatli loyihalar amalga oshirilayotgani, shuningdek, joriy yil boshidan buyon investitsiyalar hajmi sezilarli darajada oshgani eʼtirof etildi.

Shuningdek, uchrashuv davomida madaniy-gumanitar aloqalar xalqlarni yanada yaqinlashtirishga xizmat qilayotgani taʼkidlanib, kelgusidagi hamkorlikning yangi istiqbolli yoʻnalishlari belgilab olindi. Jumladan, kelgusi oyda oʻtkazilishi rejalashtirilgan nufuzli Doha forumida Oʻzbekiston delegatsiyasining ishtiroki hamda mazkur tadbir doirasida Hukumatlararo qoʻshma komissiya va Ishbilarmonlar kengashi yigʻilishlarini tashkil etish masalalari muhokama qilindi.

Yakunda davlat rahbarlari xalqaro va mintaqaviy kun tartibidagi dolzarb masalalar yuzasidan ham fikr almashib, oʻzaro manfaatli hamkorlikni davom ettirishga tayyor ekanliklarini tasdiqladilar.

Source: kun.uz