Oʻzbekiston Respublikasi Prezidenti Administratsiyasi rahbari Saida Mirziyoyeva Turkiyaga amalga oshirgan tashrifi doirasida mamlakat rasmiylari bilan muhim muzokaralar oʻtkazdi. Ushbu uchrashuv ikki davlat oʻrtasidagi strategik sheriklik munosabatlarini yanada mustahkamlash va amaliy mazmun bilan boyitish yoʻlidagi navbatdagi qadam boʻldi.

Xususan, 15-oktabr kuni boʻlib oʻtgan muloqot davomida Prezident Administratsiyasi rahbari Turkiya prezidenti kotibiyati rahbari Hasan Dogʻan hamda Prezident Administratsiyasi bosh kotibi Haqqi Susmaz bilan uchrashdi. Tomonlar ikki qardosh mamlakat oʻrtasidagi aloqalarning bugungi holati va kelgusi istiqbollarini atroflicha muhokama qilishdi.

Saida Mirziyoyeva oʻzining ijtimoiy tarmoqdagi sahifasida Oʻzbekiston va Turkiyani umumiy tarix, oʻxshash til, madaniyat va anʼanalar bogʻlab turishini alohida taʼkidladi. U koʻp qirrali munosabatlar aynan mana shunday mustahkam poydevor asosida izchil rivojlanib borayotganini qayd etdi.

Muzokaralar yakunida tomonlar hamkorlikni kengaytirish boʻyicha navbatdagi amaliy qadamlarni belgilab oldilar. Shuningdek, har ikki tomon uchun birdek manfaatli boʻlgan yangi tashabbuslarni hayotga tatbiq etish borasidagi saʼy-harakatlarni davom ettirish boʻyicha oʻzaro kelishuvga erishildi.

Source: kun.uz