Yandex Taxi kompaniyasi O'zbekiston bo'ylab o'zining keng ko'lamli «Impuls» investitsiya dasturini yangilaganini e'lon qildi va bu loyihaga yo'naltiriladigan umumiy mablag' miqdori 180 milliard so'mdan oshishi kutilmoqda.

Yangilangan shartlarga ko'ra, dastur doirasida bitta ishtirokchi uchun avtomobillarning maksimal soni avvalgi 100 tadan 500 tagacha oshirildi. Unga xizmatning amaldagi hamda yangi hamkorlari qo'shilishi mumkin bo'lib, ular 30 tadan 500 tagacha avtomobil xarid qilib, ularni servisga birinchi marta ulashni rejalashtirgan bo'lishi lozim.

Dastur qatnashchilariga qo'yilgan talablarga ko'ra, mashinalar 2025 yilda ishlab chiqarilgan yoki undan yangi bo'lishi, shuningdek, ishlab chiqarilgan sanasidan boshlab liniyaga chiqarilgunga qadar 24 oydan oshmagan bo'lishi shart. Shu bilan birga, avtomobil modellari «Komfort», «Komfort+», «Biznes» va «Elektro» tariflari talablariga mos kelishi talab etiladi.

Ilgari faqat Toshkent shahrida amal qilib kelgan dastur endilikda butun O'zbekiston hududini qamrab oldi. Biroq, tashkilotchilar barcha arizalar ham qanoatlantirilmasligi va qat'iy mezonlar asosida saralashdan o'tishini eslatib o'tdilar.

Source: uznews.uz