Poytaxtda barcha qonuniy tartib-qoidalar va notarial tekshiruvlarga rioya qilgan holda ko‘chmas mulk sotib olgan oilalar o‘z uylaridan mahrum bo‘lish xavfiga duch kelmoqda. Bunday holatlar Toshkent shahri bo‘ylab odatiy tus olib, fuqarolarni sarson qilmoqda.

Jumladan, poytaxtlik Adelina Baldina o‘z oilasi, qari onasi va ikki voyaga yetmagan farzandi bilan boshiga tushgan og‘ir vaziyatni bayon qildi. Ular Mirzo Ulug‘bek tumanidagi S-1 massividan 85 ming AQSh dollariga uch xonali kvartira sotib olgan edi. Oldi-sotdi jarayoni barcha qoidalarga muvofiq, notarius ishtirokida amalga oshirilgan va hech qanday taqiqlar aniqlanmagan.

Biroq bitim rasmiylashtirilganidan bir hafta o‘tib, prokuratura tomonidan mazkur kvartiraga taqiq qo‘yilgani ma’lum bo‘lgan. Ma’lum bo‘lishicha, marhumning xorijda yashovchi qarindoshlari meros yuzasidan o‘zaro nizolashib, turli ishonchnomalar berib yuborgan. Oqibatda sud barcha oldi-sotdi shartnomalarini haqiqiy emas deb topib, xaridorlarga faqat shartnomada ko‘rsatilgan rasmiy kadastr qiymatini (amaldagidan 14 baravar kam summani) qaytarish haqida qaror chiqargan.

Mutaxassislar va huquqshunoslarning fikricha, amaldagi qonunchilikdagi bo‘shliqlar hamda sud jarayonlaridagi xatolar fuqarolarni to‘laqonli himoya qila olmayapti. Insofli xaridorlar o‘zlarining halol harakat qilganliklarini isbotlay olmay, ham uy-joyidan, ham mablag‘idan ayrilib, ko‘chada qolish xavfi ostida qolmoqda.

Source: www.gazeta.uz