Farg'ona viloyatida is gazidan zaharlanish bilan bog'liq ketma-ket fojiali holatlar qayd etildi, bu esa jamoatchilik orasida jiddiy xavotir uyg'otmoqda. Xususan, 25-oktabr kuni Farg'ona tumani Chimyon qishlog'ida bir oilaning 7 nafar a'zosi, shuningdek, 1-noyabr kuni Qo'qon shahrining Charxiy mavzesida yana bir oilaning 5 nafar a'zosi is gazidan halok bo'ldi. Vafot etganlar orasida voyaga yetmagan yosh bolalar ham borligi vaziyatning nechog'li jiddiyligini ko'rsatadi.

O'tkazilgan dastlabki o'rganishlar natijasida ushbu xonadonlarga Germaniyaning "Vaillant" rusumli ikki konturli isitish qozonlari o'rnatilgani aniqlandi. Ma'lum bo'lishicha, ushbu uskunalar aslida xorijda o'z xizmat muddatini o'tab bo'lib, utilizatsiyaga topshirilishi kerak bo'lgan yaroqsiz qurilmalar hisoblanadi. Ayrim shubhali tadbirkorlar tomonidan bu eski vositalar O'zbekistonga ehtiyot qismlari sifatida noqonuniy yo'llar bilan olib kirilib, qo'lbola usulda yangi qiyofaga keltirilgan va fuqarolarga aldov yo'li bilan sotib yuborilgan.

Farg'ona viloyati Favqulodda vaziyatlar boshqarmasi aholiga murojaat yo'llab, bunday xavfli qozonlardan darhol voz kechishga chaqirdi. Mutaxassislarning ta'kidlashicha, mazkur qozonlar asl dudburonlarisiz olib kelingan bo'lib, ularning o'rniga yuqori harorat ta'sirida erib yoki qattiqligini yo'qotadigan mos bo'lmagan polietilen quvurlar ulangan. Bu esa o'ta xavfli is sizib chiqishiga va fojialarga sabab bo'lmoqda.

Rasmiy idoralar fuqarolardan uylariga shubhali va sertifikatsiyadan o'tmagan isitish moslamalarini o'rnatmaslikni qat'iy so'ramoqda. Har qanday isitish vositasini faqat malakali mutaxassislar ishtirokida, sifat sertifikatlari va yo'riqnomalarini jiddiy tekshirgan holda o'rnatish zarurligi yana bir bor eslatib o'tildi. Eslatib o'tamiz, avvalroq Toshkent shahrida ham shunga o'xshash holat oqibatida 6 kishi vafot etgan edi.

Source: kun.uz