Mamlakatimizda ekstremizm va terrorizmga qarshi kurashish yo‘nalishidagi qonunchilik bazasini yanada takomillashtirish hamda jinoyatchilikka qarshi murosasiz kurash olib borish maqsadida qator qonun hujjatlariga muhim o‘zgartish va qo‘shimchalar kiritildi. Ushbu o‘zgarishlarga muvofiq, taqiqlangan tashkilotlar faoliyatida qatnashganlik uchun belgilangan jazo choralari sezilarli darajada og‘irlashtirildi.

Xususan, Jinoyat kodeksiga kiritilgan yangi normalarga ko‘ra, ekstremistik, separatistik, fundamentalistik yoki boshqa taqiqlangan tashkilotlar faoliyatida ishtirok etish jinoyati sodir etilgan taqdirda, aybdor shaxslar 5 yildan 10 yilgacha bo‘lgan muddatga ozodlikdan mahrum qilish jazosi bilan jazolanishi qat’iy belgilab qo‘yildi. Mutaxassislarning fikricha, bu kabi qat'iy choralar jamiyat barqarorligini ta'minlash hamda yoshlarni yot g‘oyalardan himoya qilishga xizmat qiladi.

Shuningdek, Maʼmuriy javobgarlik to‘g‘risidagi kodeksga ham tegishli o‘zgartirishlar kiritilib, ekstremizm, separatizm yoki aqidaparastlik g‘oyalari bilan yo‘g‘rilgan materiallarni tayyorlash, saqlash yoki tarqatish uchun ma’muriy javobgarlik kuchaytirildi. Qirg‘in solishga, fuqarolarni zo‘rlik bilan ko‘chirib yuborishga da’vat etuvchi yoki aholi orasida vahima chiqarishga qaratilgan materiallar bilan bog‘liq huquqbuzarliklar uchun huquqbuzarlik ashyosini musodara qilgan holda bazaviy hisoblash miqdorining 50 baravaridan 100 baravarigacha jarima yoki 15 sutkagacha maʼmuriy qamoqqa olish choralari qo‘llanilishi belgilandi.

Bundan tashqari, mansabdor shaxslar tomonidan sodir etilgan shunday huquqbuzarliklar uchun jarima miqdorlari yanada yuqori – BHMning 100 baravaridan 150 baravarigacha etib belgilandi. Shu bilan birga, qonunchilikdagi ayrim tushunchalar ham aniqlashtirilib, xususan, amaldagi qonun hujjatlaridagi “diniy ekstremizm” so‘zlari “ekstremizm” so‘zi bilan almashtirildi, bu esa huquqni muhofaza qiluvchi organlarga profilaktika tadbirlarini yanada kengroq qamrovda olib borish imkonini beradi.

Source: kun.uz