«Ekstremizmga qarshi kurashish to‘g‘risida»gi Qonunga kiritilgan qo‘shimchalarga muvofiq, mamlakatimizda ekstremistik tashkilotlar hamda materiallarning elektron reyestri yuritila boshlandi. Ushbu muhim jarayon Adliya vazirligi zimmasiga yuklatilgan bo‘lib, tuzilayotgan ma'lumotlar bazasi orqali jamoatchilik xabardorligini oshirish ko‘zda tutilgan.

Tasdiqlangan tartibga ko‘ra, mazkur elektron reyestr Adliya vazirligining rasmiy veb-saytida ochiq holda joylashtiriladi va har qanday fuqaro uni bemalol ko‘zdan kechirishi mumkin. Bu esa jamiyatda huquqiy ongni mustahkamlash hamda noqonuniy materiallarning tarqalishining oldini olishga xizmat qiladi.

Reyestrga kiritiladigan ob'ektlar qatoriga ekstremistik faoliyatga aloqadorligi sababli faoliyati to‘xtatib turilgan yoki butunlay taqiqlangan tashkilotlar, shuningdek, sud tomonidan ekstremistik deb topilgan turli materiallar va elektron manbalar kiradi. Shu jumladan, internet tarmog‘ida tizimli ravishda — bir yil davomida ikki va undan ortiq marotaba ekstremistik mazmundagi ma'lumotlarni tarqatgan elektron manbalar ham ushbu ro‘yxatdan joy oladi.

Qonunchilikka muvofiq, material yoki manbani ekstremistik deb topish bo‘yicha harakatlar aniq mexanizm asosida amalga oshiriladi. Avvalo, vakolatli davlat organlari tomonidan Bosh prokuraturaga tegishli iltimosnoma kiritiladi va unga maxsus ekspertiza xulosasi ilova qilinadi. Bosh prokuratura taqdim etilgan hujjatlarning asosliligini o‘rganib chiqib, Oliy sudga tegishli ariza kiritadi.

Source: kun.uz