2026-2027 o'quv yilidan boshlab respublikadagi texnikum o'quvchilari ham xalqaro Work and Travel dasturlarida faol qatnashish imkoniyatiga ega bo'lishlari kutilmoqda. Kasbiy ta'lim agentligining bergan ma'lumotlariga ko'ra, ushbu yangi tartib texnikumlarning o'rta va o'rta maxsus kasbiy ta'lim dasturlarida tahsil olayotgan yoshlarni qamrab oladi va ularga chet elda ham ishlash, ham sayohat qilish yo'lini ochib beradi.

Qayd etilishicha, ushbu tashabbus doirasida o'quvchilar Yevropa Ittifoqi davlatlari, Yaponiya, Janubiy Koreya, Buyuk Britaniya, AQSh, Kanada, Avstraliya va Yangi Zelandiya kabi xorijiy davlatlarga yuborilishi ko'zda tutilgan. Biroq, xorijiy rejimlar va mamlakatlar talablari qanchalik murakkab ekanligini hisobga olsak, mazkur jarayon ko'plab byurokratik to'siqlar va moliyaviy xatarlarga duch kelishi ehtimoldan xoli emas.

Safar bilan bog'liq xarajatlarni qoplash uchun o'quvchilarga qaytarish sharti bilan ssuda, ya'ni qarz mablag'lari ajratish tartibi joriy etilishi rejalashtirilmoqda. Bu esa talabalar va ularning oilalari zimmasiga qo'shimcha moliyaviy yuklamalar va qarz majburiyatlarini yuklashi mumkin. Shuningdek, jarayonning shaffofligini ta'minlash maqsadida «Kasbiy taʼlim jarayonlarini boshqarish - EMIS RT» axborot tizimida texnikumlar va o'quvchilar haqidagi barcha ma'lumotlar yuritilishi belgilangan.

Shu bilan birga, Migratsiya agentligiga har yili 1-martga qadar xorijiy ish beruvchilar bilan hamkorlik shartnomalarini imzolash vazifasi yuklatilgan. Biroq, tashqi mehnat bozoridagi bugungi beqaror sharoitda bunday kelishuvlarning qanchalik samarali va kafolatlangan bo'lishi hozircha faqat taxmin qilinmoqda, xolos.

Source: kun.uz