O‘zbekiston raqamli texnologiyalar vaziri Sherzod Shermatov 27 million fuqaroning shaxsga doir ma'lumotlari sizib chiqqani ehtimoli haqidagi so‘nggi xabarlarga o‘z munosabatini bildirdi. U “etikali xakerlar” deb atalmish Butterfly guruhi tomonidan keltirilgan ma'lumotlarning sizib chiqish faktini hozircha tasdiqlamadi, biroq zudlik bilan qat'iy choralar ko‘rilmasa, bunday xavf haqiqatga aylanishi mumkinligidan jiddiy ogohlantirdi.

Vazir o‘z bayonotida sun'iy intellekt texnologiyalarini rivojlantirishga mablag‘ yo‘naltirar ekan, uning ortidan kelib chiqadigan kiberxavflardan himoyalanishga ham yetarli darajada sarmoya kiritish zarurligini ta'kidladi. Uning so‘zlariga ko‘ra, agar bunday xarajatlar ikkinchi darajali deb hisoblansa, kelgusida kiberxavfsizlik tahdidlari faqat ortib boradi va davlat idoralari qiyin ahvolda qolishi mumkin.

Shuningdek, Sherzod Shermatov dunyoda yuz bergan yirik kiberhodisalarni, jumladan, Binance kriptobirjasi bilan bog‘liq vaziyatni eslatib o‘tdi. Ma'lum qilinishicha, o‘zini “oq xakerlar” deb atovchi Butterfly guruhi O‘zbekiston davlat organlarining kiberxavfsizlik mutaxassislarini harakatsizlikda ayblagan edi. Guruh vakillari tizimlarga ruxsatsiz kirmaganini, faqat zaifliklar mavjudligini ko‘rsatishni maqsad qilganini da'vo qilmoqda.

Vazir zamonaviy texnologiyalar, xususan, sun'iy intellekt eski axborot tizimlaridagi zaifliklarni aniqlashda tub burilish yasaganini qayd etdi. U barcha davlat, nodavlat hamda tijorat tashkilotlarini o‘z axborot tizimlarini doimiy ravishda tekshirib borishga va aniqlangan kamchiliklarni o‘z vaqtida bartaraf etishga chaqirdi.

So‘z yakunida Sherzod Shermatov mutaxassislarga DXX Kiberxavfsizlik markazi va UzCERT xizmatining ogohlantirishlarini diqqat bilan kuzatib borishni tavsiya qildi. Uning fikricha, kiberxavfsizlikni yetarli darajada moliyalashtirmaslik va mutaxassislar tayyorlashga e'tibor bermaslik raqamlashtirish jarayonida jiddiy muammolarni keltirib chiqarishi mumkin.

Source: www.gazeta.uz