Xalqaro tahliliy agentlik hisoblangan QS Quacquarelli Symonds oliy ta’lim muassasalarining navbatdagi «QS World University Rankings: Asia 2027» reytingi natijalarini rasman e’lon qildi. Ushbu nufuzli ro‘yxatga Osiyoning 26 ta mamlakati va hududidan jami 1722 ta yetakchi universitet kiritilgan. Mazkur xalqaro tahlilda O‘zbekiston nomidan 38 ta oliy o‘quv yurti ishtirok etib, ularning 15 tasi reytingga ilk marotaba kiritildi. Umuman olganda, mamlakatimiz oliygohlarining umumiy ko‘rsatkichlari o‘tgan davrga nisbatan 17 foizga yaxshilangan.
O‘zbekiston oliy ta’lim muassasalari orasida yetakchilik mavqeini Toshkent irrigatsiya va qishloq xo‘jaligini mexanizatsiyalash muhandislari instituti (TIQXMMI Milliy tadqiqot universiteti) saqlab qoldi va Osiyo miqyosida 113-o‘rinni egalladi, biroq mazkur dargoh o‘tgan yilgi natijasiga nisbatan 10 pog‘onaga pastladi. Mirzo Ulug‘bek nomidagi O‘zbekiston Milliy universiteti 196-o‘rinda qayd etilgan bo‘lsa, Samarqand davlat universiteti birdaniga 92 pog‘onaga ko‘tarilib, 215-o‘ringa joylashdi. Eng hayratlanarli o‘sishni esa Namangan davlat texnika universiteti ko‘rsatdi — u bir yo‘la 245 pog‘onaga ilgarilab, 469-o‘ringa yetib oldi.
Mintaqaviy kuchli 600 talik ro‘yxatiga mamlakatimizning boshqa qator yetakchi muassasalari ham kirishga muvaffaq bo‘ldi. Jumladan, Toshkent davlat iqtisodiyot universiteti 255-o‘rinni, Toshkent davlat texnika universiteti 281-o‘rinni, Muhammad al-Xorazmiy nomidagi Toshkent axborot texnologiyalari universiteti 549-o‘rinni, Toshkent davlat transport universiteti 553-o‘rinni, Nizomiy nomidagi Milliy pedagogika universiteti 578-o‘rinni hamda Urganch davlat universiteti 590-o‘rinni band etdi.
QS ekspertlarining xulosasiga ko‘ra, O‘zbekiston oliy o‘quv yurtlari «ish beruvchilar orasidagi obro‘», «xorijiy professor-o‘qituvchilar ulushi» hamda «talabalar almashinuvi» kabi mezonlarda barqaror va yuqori natijalar ko‘rsatmoqda. Shu bilan birga, ilmiy-tadqiqot faoliyati samaradorligi hamon asosiy kamchilik bo‘lib qolmoqda: «har bir maqolaga to‘g‘ri keladigan iqtiboslar soni» va «bir o‘qituvchiga to‘g‘ri keladigan ilmiy nashrlar» bo‘yicha eng past ballar qayd etilgan. QS katta vitse-prezidenti Ben Sauter ta’kidlaganidek, keyingi yutuqlar ilmiy salohiyatni xalqaro darajaga olib chiqish bilan bevosita bog‘liqdir.
Qayd etish joizki, Osiyo qit’asi bo‘yicha peshqadamlikni Gonkong universiteti saqlab qolgan bo‘lsa, keyingi o‘rinlarni Pekin universiteti va Tsinxua universiteti egalladi. Markaziy Osiyo hududidan esa mazkur keng qamrovli reytingga O‘zbekiston, Qozog‘iston, Qirg‘iziston va Tojikistonning umumiy hisobda 99 ta oliy o‘quv yurti kiritilgan.
Source: www.gazeta.uz