Fransiya Prezidenti Emmanuel Makron Yevropa Ittifoqining uran taʼminotida Rossiyaga boʻlgan qaramligini tan oldi va Oʻzbekistonni asosiy muqobil yetkazib beruvchilardan biri sifatida koʻrsatdi. U Yevropa Ittifoqining energetik xavfsizligini mustahkamlash va risklarni kamaytirish uchun importni diversifikatsiya qilishga chaqirdi.
Makronning soʻzlariga koʻra, Oʻzbekiston bilan bir qatorda Qozogʻiston, Mongoliya, Kanada va Avstraliya ham uran ishlab chiqaruvchi davlatlar sifatida tilga olindi. Fransiya rahbari bu mamlakatlarning Yevropa Ittifoqining uran manbalarini diversifikatsiya qilish strategiyasida muhim rol oʻynashi mumkinligini taʼkidladi.
Oʻzbekistonga alohida eʼtibor uning tasdiqlangan uran zahiralariga ega boʻlgan davlatlar qatoriga kirishi va soʻnggi yillarda eksport salohiyatini faol rivojlantirishi bilan bogʻliq. Mamlakat xalqaro kompaniyalar bilan hamkorlikni kuchaytirgan va Yevropa Ittifoqi uchun energetik xavfsizlik masalalarida istiqbolli hamkor sifatida qaralmoqda.
Makron yadro energetikasini mamlakatlarning mustaqilligi, suvereniteti, dekarbonizatsiya va iqtisodiy oʻsishning „kaliti“ deb atadi. U yaqin kunlarda Fransiyada yadro siyosati boʻyicha kengash majlisi boʻlib oʻtishini va u yerda davlat energetika dasturiga asoslangan yangi qarorlar qabul qilinishini qoʻshimcha qildi.
Oʻzbekistonning muqobil uran yetkazib beruvchisi sifatida tilga olinishi mamlakatning jahon bozoridagi pozitsiyalarini mustahkamlash va Yevropa Ittifoqi bilan hamkorlikni rivojlantirish uchun yangi imkoniyatlar ochadi. Bu Yevropa Ittifoqining Rossiyaga qaramligini kamaytirish va energetik suverenitetini mustahkamlashga yordam berishi mumkin.
Ilgari Xalqaro Atom Energiyasi Agentligi Oʻzbekiston va Markaziy Osiyoning qoʻshni mamlakatlaridagi uran chiqindilarini rekultivatsiya qilish boʻyicha strategik rejani tasdiqlagan edi. 2030-yilgacha moʻljallangan hujjat Sovet davrida uran qazib olishdan zarar koʻrgan hududlarni bosqichma-bosqich tozalashni, shu jumladan xalqaro moliyaviy va ixtisoslashtirilgan tashkilotlarni jalb qilishni nazarda tutadi.
Source: podrobno.uz