O‘zbekiston Prezidenti Shavkat Mirziyoyev 6-mart kuni Afg‘oniston bilan preferensial savdo to‘g‘risidagi kelishuvni ratifikatsiya qilish to‘g‘risida farmon imzoladi. Bu hujjat Lex.uz portali orqali e’lon qilindi va ikki davlat o‘rtasidagi iqtisodiy hamkorlikni chuqurlashtirishga qaratilgan.

Kelishuv 2025-yil 10-iyun kuni Toshkentda bo‘lib o‘tgan Toshkent xalqaro investitsiya forumida imzolangan. O‘zbekiston tomonidan investitsiyalar, sanoat va savdo vaziri Laziz Qudratov, Afg‘oniston tomonidan esa sanoat va savdo vaziri vazifasini bajaruvchi Nuriddin Azizi imzo chekkan. Kelishuvning amalga oshirilishi uchun mas’ul organlar sifatida Investitsiyalar, sanoat va savdo vazirligi hamda Iqtisodiyot va moliya vazirligi huzuridagi Bojxona qo‘mitasi belgilangan.

Hujjat 14 turdagi tovarlar bo‘yicha bojxona to‘lovlarini bekor qilish, Afg‘oniston qishloq xo‘jaligi mahsulotlari uchun fitosanitariya tartiblarini soddalashtirish va o‘zbekistonlik eksportchilarni qo‘llab-quvvatlash choralarini kengaytirishni nazarda tutadi. Tashqi ishlar vazirligiga Afg‘oniston tomoniga O‘zbekistonda ichki davlat tartiblari bajarilganligi haqida xabar berish topshirilgan.

Kelishuv kuchga kirgandan so‘ng uning qoidalarini amalga oshirish ustidan nazorat Vazirlar Mahkamasi va tegishli davlat organlariga yuklatilgan. Fevral oyida O‘zbekiston Bosh vazir o‘rinbosari Jamshid Xo‘jayev Nuriddin Azizi bilan onlayn muzokaralar o‘tkazib, kelishuvning tezroq kuchga kirishi, investitsiya loyihalarini rivojlantirish va ikki davlat o‘rtasida sanoaviy hamkorlikni muhokama qilgan.

Shuningdek, Ramazon oyidan keyin Kobulda yangi qo‘shma biznes-forum o‘tkazish rejalashtirilgan, bu savdo-iqtisodiy hamkorlikni rivojlantirish uchun platforma bo‘lishi kutilmoqda. Xo‘jayevning LinkedIn’dagi ma’lumotlariga ko‘ra, 2021-2025-yillar oralig‘ida o‘zaro savdo hajmi 2,5 baravar o‘sib, 1,7 milliard dollarga yetgan.

Source: kun.uz