Xalqaro atom energiyasi agentligi (MAGATE) 2026-yilning ikkinchi yarmida O‘zbekistonga tashrif buyurib, mamlakatdagi birinchi atom elektr stansiyasi (AES) qurilish jarayonini chuqur o‘rganishni rejalashtirmoqda. Bu haqda “O‘zatom” agentligi matbuot xizmati xabar berdi. Tomonlar o‘rtasidagi hamkorlik “O‘zatom” direktori Azim Axmedxadjayev va MAGATE bosh direktori Rafael Grossining Parijda bo‘lib o‘tgan Yadro energiyasi bo‘yicha II xalqaro sammit doirasidagi uchrashuvida muhokama qilindi.
Uchrashuvda, shuningdek, Jizzax viloyatining Forish tumanida joylashgan AES maydonchasida dastlabki beton quyish ishlarini boshlash masalasi ko‘rib chiqildi. MAGATE rahbari Grossi loyihaning ahamiyatini ta’kidlab, uning o‘ziga xos jihati – yagona majmua doirasida katta va kichik quvvatli reaktorlarni integratsiya qilish rejasiga e’tibor qaratdi. Bu yondashuv O‘zbekistonning yadroviy dasturini amalga oshirishda muhim qadam hisoblanadi.
Uchrashuv yakunlariga ko‘ra, MAGATE bosh direktori O‘zbekiston yadroviy dasturini qo‘llab-quvvatlashni davom ettirishga tayyorligini tasdiqladi va dastlabki beton quyish ishlarini boshlash marosimida ishtirok etish taklifini qabul qildi. Tomonlar, shuningdek, MAGATE kotibiyatida o‘zbekistonlik mutaxassislar sonini ko‘paytirishga o‘zaro qiziqish bildirdi, bu milliy tajribani xalqaro loyihalarga samaraliroq integratsiya qilish va mamlakatning atom sohasidagi kadrlar salohiyatini mustahkamlash imkonini beradi.
O‘tgan yilning oktabr oyida AES uchun kotlovan qazish ishlari boshlangan, 2026-yil boshida “O‘zatom” stansiyani qurish uchun ruxsatnoma olishni rejalashtirgan, ilk beton quyish ishlari esa mart oyiga mo‘ljallangan. Loyiha tarkibiga 3+ avlodiga mansub VVER-1000 bazasidagi ikkita yuqori quvvatli energiya bloki hamda har biri 55 MVt quvvatga ega bo‘lgan RITM-200N kichik reaktorli ikkita energiya bloki kiradi. Butun stansiya qurilishini 2035-yilda yakunlash rejalashtirilgan.
Source: www.gazeta.uz