Shimoliy Atlantika Shartnomasi Tashkiloti (NATO) rahbariyati har yili o‘tkaziladigan sammitlardan voz kechish imkoniyatini ko‘rib chiqmoqda. Bu haqda 27 aprel kuni Reuters agentligi yuqori martabali amaldor va a’zo davlatlarning besh nafar diplomatiga tayanib xabar berdi.

Nashrning ta’kidlashicha, bunday qadam AQSh prezidenti Donald Tramp bilan ushbu tadbirlar ishtirokchilari o‘rtasida yuzaga kelishi mumkin bo‘lgan «keskinliklarni» oldini olishga imkon beradi. Tramp o‘zining Oq uydagi prezidentlik muddatining so‘nggi yilida.

Tramp alyansning boshqa a’zolarini bir necha bor tanqid qilgan, oxirgi marta esa ular AQSh va Isroilning Eronga bosim o‘tkazish bo‘yicha sa’y-harakatlarida faol ishtirok etmaganliklari uchun.

NATO sammitlarining chastotasi tashkilotning 77 yillik tarixi davomida o‘zgarib turdi. 2001 yildan keyin ular har yili o‘tkaziladigan muntazam tus oldi. Navbatdagi uchrashuv Turkiya poytaxtida 2026 yil 7-8 iyulga rejalashtirilgan. Biroq, agentlikka ma’lumot bergan manbalarga ko‘ra, barcha a’zolar bunday zich jadvalni qo‘llab-quvvatlamaydi — «sekinlashtirish» chaqiriqlari eshitilmoqda.

Bir diplomatning fikricha, 2027 yilda Albaniyada bo‘lib o‘tadigan NATO sammiti, ehtimol, o‘tkaziladi, ammo 2028 yildagi uchrashuv bekor qilinishi mumkin. Joriy yilda Qo‘shma Shtatlarda navbatdagi prezidentlik saylovlari bo‘lib o‘tadi, natijasida Donald Tramp davlat rahbari vakolatlarini topshiradi.

Reuters so‘roviga javoban alyans vakili ta’kidladi: «NATO davlat va hukumat rahbarlarining muntazam uchrashuvlarini o‘tkazishda davom etadi, sammitlar oralig‘ida esa NATO ittifoqchilari umumiy xavfsizligimiz bo‘yicha maslahatlashuvlar va qarorlar qabul qilishni davom ettiradilar».

Ikki suhbatdosh bunday muhokamalarni Tramp shaxsi bilan bog‘lagan bo‘lsa, yana bir qancha manbalar bunday mulohazalar birinchi navbatda uzoq muddatli rejalashtirish mantig‘idan kelib chiqqanligini ta’kidladi.

Source: kun.uz