Isroil harbiylari bosib olingan G‘arbiy Sohilning janubidagi Xabron shahrida mahalliy aholini uylarini tark etishga majbur qilib, ularni harbiy kazarma va kuzatuv punktlariga aylantirgani aytilmoqda. Falastinning Wafa axborot agentligi tarqatgan ma'lumotlarga ko'ra, bu harakatlar hududda davom etayotgan keng ko'lamli harbiy amaliyot doirasida amalga oshirilmoqda.

Ma'lum qilinishicha, harbiylar Xabronning janubiy qismidagi Xallat Manna va Dahiyat az-Zaytun hududlaridagi turar-joylarni egallab olgan. Shuningdek, boshqa mahallalarda ham fuqarolar o'z uylaridan majburan chiqarib yuborilib, mazkur binolardan kuzatuv postlari sifatida foydalanilayotgani iddao qilinmoqda.

Ushbu majburiy ko'chirishlar yuzlab oilalarning uylarini tark etishiga olib keldi. Falastin Mahbuslar jamiyati ma'lumotlariga ko'ra, juma kunidan buyon kamida 47 nafar falastinlik hibsga olingan, 293 ta oila, ya'ni taxminan 2200 kishi o'z boshpanasidan mahrum bo'lgan. Majburan ko'chirilganlar orasida chaqaloqlar, homilador ayollar va keksalar ham borligi aytilmoqda.

Voqealar fonida Isroil ko'chmanchilari Xabron janubidagi Yatta shahri yaqinida falastinliklarga tegishli yerlarda ikkita yangi punkt barpo etishni boshlagani xabar qilindi. Faollarning ta'kidlashicha, ko'chmanchilar og'ir texnikalar yordamida yerlarni tekislab, infratuzilma tarmoqlarini o'rnatishga kirishgan. Shuningdek, Baylahm yaqinida ham yo'llarning yopilishi va cheklovlar davom etayotgani qayd etilgan.

Source: www.aljazeera.com