Xarkov viloyati gubernatori Oleg Sinegubovning ma’lum qilishicha, Rossiya qo‘shinlari Xarkov viloyatidagi Merefa shahriga raketa hujumi uyushtirgan. Hujumda kamida besh kishi halok bo‘lib, 18 kishi yaralangan.

Sinegubovning Telegram’dagi bayonotiga ko‘ra, hujumda fuqarolik infratuzilmasi, jumladan kamida 10 ta uy va to‘rtta do‘kon nishonga olingan. U ikki erkak va uch ayol halok bo‘lganini, to‘rt nafar yaralanganning ahvoli og‘ir ekanini ta’kidlagan.

Viloyat prokuraturasi ma’lumotlariga ko‘ra, Rossiya kuchlari “Iskander” tipidagi ballistik raketadan foydalangan. Rossiya tomoni hozircha Xarkovdagi zarba yuzasidan izoh bermagan, biroq Moskva 2022-yil fevral oyida Ukrainaga to‘liq miqyosli bosqin boshlanganidan beri tinch aholini ataylab nishonga olishni rad etib kelmoqda.

Shu bilan birga, dushanbaga o‘tar kechasi Ukraina Moskvaga uchuvchisiz samolyotlar bilan hujum qilgan. Zarba Kremldan 10 km janubi-g‘arbda joylashgan hashamatli Mosfilmovskaya ko‘chasidagi turar-joy binosiga berilgan. Moskva meri Sergey Sobyanin qurbonlar yo‘qligini ma’lum qilgan.

Rossiya davlat teleradiokompaniyasi “Rossiya-1” zarar ko‘rgan kvartiraning qulagan devorlari va singan eshiklari aks etgan videoni e’lon qilgan. Yana ikkita dron havo hujumiga qarshi mudofaa tizimlari tomonidan qaytarilgan.

Moskvaga qilingan kamdan-kam hujumlar Rossiyaning yillik G‘alaba kuni paradiga besh kun qolganida sodir bo‘ldi. Bu yilgi parad harbiy texnikasiz o‘tkaziladi. Ukraina prezidenti Volodimir Zelenskiy Armanistondagi sammitda Yevropa yetakchilari bilan birga bo‘lib, Rossiyaning kadetlar va harbiy texnikani paradga jalb qilmaslik qaroriga ishora qilib, “Ular Qizil maydon ustida dronlar g‘uvillashidan qo‘rqishadi”, degan.

Kiyev so‘nggi haftalarda Rossiyaning neftni qayta ishlash zavodlari, portlari va omborlariga zarbalarni kuchaytirgan. Biroq Ukraina dronlari havo hujumiga qarshi mudofaa tizimlari bilan qattiq qo‘riqlanadigan Moskvaga kamdan-kam yetib boradi.

Source: www.aljazeera.com