Samarqand viloyati Yo‘l harakati xavfsizligi boshqarmasi maʼlumotlariga ko‘ra, uch nafar fuqaro jamiyatda xulq-atvor qoidalarini buzgan va mayda xuliganlik harakatlarini amalga oshirib, buni videoga olib ijtimoiy tarmoqlarga yuklaganliklari uchun maʼmuriy qamoq jazosiga tortildi.

Voqea bo‘yicha tergov shuni ko‘rsatdiki, videoda ko‘rsatilgan haydovchi aslida eshitish qobiliyati cheklangan shaxs emas edi. Boshqarma bayonotida: "O‘zlariga eʼtibor qaratishni istagan uch nafar yigit video yozib, uni ijtimoiy tarmoqlarga joylashtirdi. Bu foydalanuvchilarning asosli noroziligiga sabab bo‘ldi", deb taʼkidlangan.

Huquqbuzarlar aniqlangach, ularning ishi Samarqand shahar jinoiy ishlar bo‘yicha sudida ko‘rib chiqildi. Natijada, avtomobil haydovchisi 8 sutka, ikki yo‘lovchi esa har biri 10 sutkaga maʼmuriy qamoq jazosiga hukm qilindi.

Shuningdek, tergov jarayonida haydovchining haydovchilik guvohnomasi yo‘qligi, yaʼni hujjatsiz transport vositasini boshqarganligi aniqlandi. Unga nisbatan Maʼmuriy javobgarlik to‘g‘risidagi kodeksning 135-moddasi 2-qismi (Yo‘l harakati qoidalarida belgilangan hujjatlarni tasdiqlovchi hujjatlari bo‘lmagan shaxslar tomonidan transport vositasini boshqarish) bo‘yicha maʼmuriy protokol tuzildi va avtomobil jarima maydonchasiga joylashtirildi.

Source: kun.uz