Avstraliyaning Shimoliy hududida sayohat chog‘ida hojatxonaga kirgan ayol chuqur hojatxona (pit latrine) qulashi natijasida beligacha chiqindi chuquriga tiqilib qoldi.

Mahalliy hokimiyat ma’lumotlariga ko‘ra, ayol taxminan uch soat davomida chiqindi chuqurida qamalib qolgan va tasodifan o‘tib ketayotgan mahalliy usta tomonidan qutqarilgan.

Ayol eri va ikki farzandi bilan Darvindan Kanberraga qaytayotgan bo‘lgan. Hodisa Alis-Springs shahridan 145 km janubi-g‘arbda joylashgan Henbury Meteoritlar Himoya Zonasida sodir bo‘lgan.

Guvohlarning so‘zlariga ko‘ra, ayolning eri ustaning e’tiborini jalb qilgan, usta chuqurga arqon tushirib, ayolni ushlab olishiga yordam bergan va keyin mashinasi bilan uni tortib chiqargan. Bu jarayon 45 daqiqadan ko‘proq vaqt olgan.

Ayol kasalxonaga yotqizilgan, ammo jiddiy jarohat olmagan. Shimoliy hududning Mehnat xavfsizligi boshqarmasi (NT WorkSafe) hodisa yuzasidan tergov boshlagan.

Bu Avstraliyada birinchi bunday hodisa emas. 2024-yil iyulida Viktoriya shtatida bir erkak, 2012-yilda esa Markaziy Kvinslendda 65 yoshli ayol shunday hojatxonaga yiqilib, oyog‘ini sindirgan edi.

Boshqa mamlakatlarda ham pit-latrinalar halokatli oqibatlarga olib kelgan. 2014-yilda Janubiy Afrikada besh yoshli o‘quvchi, 2018-yilda esa yana bir o‘quvchi shunday hojatxona qulashi natijasida halok bo‘lgan. Shu yili Janubiy Afrika hukumati maktablardagi bunday hojatxonalarni butunlay yo‘q qilishga va’da bergan edi.

Source: www.bbc.com