O‘zbekistonning bir necha hududlarida huquq-tartibot organlari tomonidan kuchli ta’sir qiluvchi dorilarni noqonuniy sotish bilan shug‘ullangan shaxslarga qarshi keng ko‘lamli operatsiyalar o‘tkazildi. Natijada mingdan ortiq tabletkalar musodara qilindi va bir qator fuqarolarga nisbatan jinoiy ish qo‘zg‘atildi.

Xususan, Xorazm viloyati Yangiariq tumanida Bosh prokuratura huzuridagi departament xodimlari boshqa huquqni muhofaza qiluvchi organlar bilan hamkorlikda ikki nafar fuqaroni 50 dona “Gabaten” preparatini sotish vaqtida qo‘lga oldi. Ular jinoyat ustida ushlangan.

Toshkent viloyati Guliston shahrida ham shunday holat qayd etildi. Tezkor tadbir davomida uch nafar fuqaro 46 dona “Zardex” tabletkasini realizatsiya qilayotganda qo‘lga olindi.

Toshkent shahrining Uchtepa tumanida esa Onix rusumli avtomobil salonida o‘tkazilgan tekshiruv chog‘ida kuchli ta’sir qiluvchi moddalarni o‘z ichiga olgan 930 dona dori vositasi topildi. Ular keyinchalik noqonuniy sotish uchun mo‘ljallangani aniqlangan. Barcha mahsulotlar ashyoviy dalil sifatida musodara qilindi.

Barcha aniqlangan holatlar bo‘yicha Jinoyat kodeksining 251-1-moddasi (giyohvandlik yoki psixotrop moddalarga kirmaydigan kuchli ta’sir qiluvchi moddalarning noqonuniy aylanishi) bilan jinoiy ishlar qo‘zg‘atildi. Hozirda tergov harakatlari davom etmoqda.

Eslatib o‘tamiz, avvalroq Farg‘ona viloyatida huquq-tartibot organlari Qirg‘izistondan kuchli ta’sir qiluvchi dorilarni kontrabanda qilish urinishining oldini olgan edi. Mahalliy fuqaro qo‘lida psixotrop moddalar bo‘lgan qariyb uch ming tabletka topilgan.

Source: podrobno.uz