O‘zbekiston Respublikasi Tashqi ishlar vazirligida Yevropa Ittifoqi (YI) bilan hamkorlikni yanada kengaytirish masalalari muhokama qilindi. Uchrashuvda ikki tomonlama munosabatlarning hozirgi holati va istiqbollari ko‘rib chiqildi.

Tashqi ishlar vaziri vazifasini bajaruvchi Baxtiyor Saidov YI maxsus vakili bilan muzokaralar olib bordi. Tomonlar iqtisodiy, investitsion va madaniy aloqalarni chuqurlashtirish, shuningdek, mintaqaviy xavfsizlik masalalarida hamkorlik qilishga kelishib oldi.

YI vakili O‘zbekistonda amalga oshirilayotgan islohotlarni yuqori baholab, ushbu jarayonlarni qo‘llab-quvvatlashga tayyorligini bildirdi. Shuningdek, YI tomonidan O‘zbekistonga ajratilayotgan texnik yordam va grant dasturlari samaradorligi muhokama qilindi.

Muzokaralar yakunida ikki tomonlama hujjatlar imzolanishi va qo‘shma loyihalarni amalga oshirish bo‘yicha aniq rejalar belgilandi. Ushbu hamkorlik O‘zbekistonning YI bilan strategik sherikligini mustahkamlashga xizmat qiladi.

Source: uznews.uz