Ispaniya hukumati MV Hondius kruiz kemasini Kanar orollari tarkibidagi Tenerife oroliga qo‘yishga yashil chiroq yoqdi. Kema ekipaji va yo‘lovchilari orasida hantavirus epidemiyasi qayd etilgan bo‘lib, uch kishi hayotdan ko‘z yumgan. Biroq, Kanar orollari mintaqaviy hukumati bu qarorga keskin qarshi chiqdi.

Mintaqa rahbari Fernando Klavixoning ta’kidlashicha, qaror hech qanday texnik mezonlarga asoslanmagan va aholi xavfsizligini kafolatlash uchun yetarli ma’lumot berilmagan. U virus tarqalishi xavfi sababli kemani qabul qilishga rozi emasligini bildirgan. Klavixo, shuningdek, Ispaniya Bosh vaziri Pedro Sanches bilan shoshilinch uchrashuv talab qilgan.

MV Hondius kemasi hozirda Kabo-Verde yaqinida langar tashlab turibdi. Uch yo‘lovchi vafot etgan, yana bir necha kishi kasallik alomatlarini namoyon qilmoqda. Kasallikning And tog‘lari shtammi aniqlangan bo‘lib, bu tur odamdan odamga yuqishi mumkin. Janubiy Afrika sog‘liqni saqlash idoralari bu shtammni tasdiqlagan.

Ispaniya Sog‘liqni saqlash vazirligi kemadagi barcha yo‘lovchilar va ekipaj a’zolari tekshiruvdan o‘tkazilishi, davolanilishi va keyin o‘z mamlakatlariga jo‘natilishini ma’lum qildi. Qaror xalqaro huquq va gumanitar tamoyillarga asoslangan bo‘lib, Kabo-Verde vaziyatni boshqarish imkoniyatiga ega emasligi bilan izohlangan.

Hantavirus kemiruvchilar orqali yuqadigan kasallik bo‘lib, grippga o‘xshash alomatlar bilan boshlanadi. Virus asosan ifloslangan changni nafas olish orqali yuqadi. And tog‘lari virusi bundan mustasno, chunki u odamdan odamga o‘tishi mumkin, ammo bu juda kam uchraydi.

Source: www.dw.com