Yaqin Sharqdagi vaziyat tufayli O‘zbekiston aeroportlaridan Saudiya Arabistoni, BAA, Qatar, Eron, Kuvayt va Isroilga aviaqatnovlar to‘xtatildi. Bu barcha aviakompaniyalarga tegishli, deb xabar berdi Uzbekistan Airports.

Aviakompaniyalarga faqat 28-fevralgacha chiqib ketgan yo‘lovchilarni qaytarish uchun reyslar o‘tkazishga ruxsat berilgan. Cheklovlarning tugash sanasi aniq emas, lekin NOTAM tizimida Saudiya Arabistoniga tashish 18-martgacha cheklanganligi ko‘rsatilgan.

Uzbekistan Airports rasmiy manbalardan foydalanishni tavsiya qildi. Fuqarolar uchinchi davlatlar orqali safar tashkil qilishni va‘da qilayotgan shaxslarga ishonmaslikka chaqirildi.

Avvalroq Tashqi ishlar vazirligi Yaqin Sharq mamlakatlariga safarlarni qoldirishni tavsiya qilgan. Prezident vatandoshlarni Saudiya Arabistoni, BAA va Qatardan qaytarish uchun aviareyslar tashkil etishni topshirgan.

Musulmonlar idorasi umra ziyorati dasturi to‘xtatilganini ma‘lum qildi. Saudiya Arabistonida 1000 dan ortiq o‘zbekistonlik ziyoratchi bor.

Source: www.gazeta.uz